ఐబొమ్మ (iBomma) కేసులో అరెస్టయిన నిర్వాహకుడు రవిని పోలీసులు రిమాండ్‌లోకి తీసుకున్న తర్వాత, మొదటి రోజు సుదీర్ఘంగా కీలక అంశాలపై విచారణ జరిపారు. దర్యాప్తు బృందం ప్రధానంగా వెబ్‌సైట్ ఆపరేషన్, ట్రాఫిక్ సోర్సెస్, రీడైరెక్షన్ పద్ధతులు వంటి సాంకేతిక సమాచారాన్ని రాబట్టడంపై దృష్టి పెట్టింది. ముఖ్యంగా, ఇవాళ బయటకు వచ్చిన “IBomma One” అనే నూతన లింక్‌పై కూడా రవిని ప్రశ్నించారు. ఈ లింక్ ఎలా “Movie Rules” వంటి ఇతర డొమైన్‌లకు ఆటోమేటిక్‌గా రీడైరెక్ట్ అవుతోంది, దాన్ని ఎవరు నిర్వహిస్తున్నారు మరియు ఎలాంటి పేమెంట్ సిస్టమ్స్ ఉపయోగిస్తున్నారు అనే విషయాలపై పోలీసులు ఆరా తీశారు.
పోలీసులు నెదర్లాండ్స్‌లో (Netherlands) ఉన్న హోస్టింగ్ సర్వర్లపై రవికి ఉన్న యాక్సెస్, అక్కడ నిల్వ చేసిన డేటా స్ట్రక్చర్, డౌన్‌లోడ్ లాగ్స్, యూజర్ ట్రాఫిక్ వంటి డిజిటల్ ఆధారాలను పరిశీలిస్తున్నారు. రవి వాడిన పాత, కొత్త మొబైల్ ఫోన్ల వివరాలు, చాట్ హిస్టరీలను కూడా విశ్లేషిస్తున్నారు. రవి వద్ద ఉన్న హార్డ్ డిస్క్‌ల పాస్‌వర్డ్‌లు, యాక్టివ్ మరియు ఇనాక్టివ్ క్రిప్టో వాలెట్ల వివరాలు, NRE ఖాతాల లావాదేవీలు మరియు డబ్బు ప్రవాహంపై అధికారులు సుదీర్ఘంగా ప్రశ్నలు సంధించారు.
పైరసీ ద్వారా వచ్చిన అనుమానాస్పద ట్రాన్సాక్షన్లు, ఆదాయం, విదేశీ అకౌంట్లకు జరిగిన మార్పిడి వంటి ఆర్థిక విషయాలను పోలీసులు వెలికితీయడానికి ప్రయత్నిస్తున్నారు. కస్టడీ ఇంకా కొనసాగుతుండటంతో, రాబోయే రోజుల్లో ఫైల్ స్టోరేజ్ నెట్‌వర్క్, టీమ్ సభ్యుల లొకేషన్, డిజిటల్ పేమెంట్ చైన్ వంటి మరిన్ని సాంకేతిక వివరాలు వెలుగులోకి వచ్చే అవకాశం ఉందని దర్యాప్తు వర్గాలు చెబుతున్నాయి.
