హర్మన్‌ప్రీత్ కౌర్ నేతృత్వంలోని భారత మహిళా క్రికెట్ జట్టు, వన్డే ప్రపంచకప్ ఫైనల్లో దక్షిణాఫ్రికాపై 52 పరుగుల తేడాతో ఘన విజయం సాధించి, తొలిసారి కప్‌ను కైవసం చేసుకుంది. ఈ చారిత్రాత్మక విజయం దేశవ్యాప్తంగా ఆనందాన్ని నింపగా, సోషల్ మీడియాలో మరో ఆసక్తికరమైన చర్చ మొదలైంది. అదే భారత మహిళా క్రికెట్ లెజెండ్ జులన్ గోస్వామి జీవితం ఆధారంగా తెరకెక్కుతున్న బయోపిక్ ‘చక్‌దా ఎక్స్‌ప్రెస్’ విడుదల గురించి.
అనుష్క శర్మ ప్రధాన పాత్రలో నటిస్తున్న ఈ చిత్రం, భారత మహిళా క్రికెట్ విజయగాథకు స్ఫూర్తిగా నిలవాల్సిన సమయంలో, గత రెండు సంవత్సరాలుగా ఎలాంటి కొత్త అప్‌డేట్ లేకుండా నిలిచిపోయింది. ఈ సినిమా నెట్‌ఫ్లిక్స్‌లో విడుదల కానుందనే ప్రకటనతో పాటు కేవలం టీజర్‌ను మాత్రమే విడుదల చేశారు.
ఇప్పుడు మహిళల జట్టు సాధించిన ఈ అద్భుతమైన విజయం నేపథ్యంలో, నెటిజన్లు సోషల్ మీడియాలో ఈ సినిమాను వెంటనే విడుదల చేయాలని డిమాండ్ చేస్తున్నారు. జులన్ గోస్వామి స్ఫూర్తిదాయక ప్రయాణం, ప్రస్తుత ప్రపంచకప్ విజయంతో కలిపి చూసినప్పుడు మరింత ప్రభావవంతంగా, భావోద్వేగంగా ఉంటుందని వారు అంటున్నారు. ప్రోసిత్ రాయ్ దర్శకత్వం వహిస్తున్న ఈ సినిమా, భారత మహిళా క్రికెట్‌కు కొత్త ఊపునివ్వగలదని అభిమానులు ఆశాభావం వ్యక్తం చేస్తున్నారు.
