తెలుగు మరియు కన్నడ సీరియల్స్‌లో నటించే నటి రజిని (41), గత మూడు నెలలుగా సోషల్ మీడియా వేదికల ద్వారా లైంగిక వేధింపులకు గురైన సంఘటన తీవ్ర చర్చనీయాంశమైంది. ‘నవీన్ కె మోన్’ అనే వ్యక్తి మొదట ‘Naveenz’ పేరుతో ఫేస్‌బుక్‌లో ఫ్రెండ్ రిక్వెస్ట్ పంపగా, నటి అంగీకరించకపోవడంతో, మెసెంజర్ ద్వారా అశ్లీల సందేశాలు మరియు తన ప్రయివేట్ పార్ట్స్ వీడియోలను పంపడం ప్రారంభించాడు. నటి పలుమార్లు అతడిని బ్లాక్ చేసినా, నిందితుడు కొత్త ఫేక్ ఖాతాలను సృష్టించి వేధింపులను కొనసాగించాడు.
పలుమార్లు హెచ్చరించినా నిందితుడి తీరులో మార్పు రాకపోవడంతో, నటి రజిని చివరకు పోలీసులను ఆశ్రయించింది. నవంబర్ 1న నిందితుడు మళ్లీ మెసేజ్‌ చేయగా, ఆమె స్వయంగా అతడిని కలిసి హెచ్చరించినా ఫలితం లేకపోయింది. దీంతో ఆమె సాక్ష్యాధారాలతో బెంగళూరు పోలీసులకు ఫిర్యాదు చేసింది. ఈ ఫిర్యాదు ఆధారంగా పోలీసులు లైంగిక వేధింపులు, ఐటీ చట్టంలోని పలు సెక్షన్ల కింద కేసు నమోదు చేశారు. విచారణలో నిందితుడు ఫేక్ ఐడీల ద్వారా వీడియోలు పంపినట్లు నిర్ధారించారు.
నిందితుడైన నవీన్ కె మోన్, బెంగళూరులోని ఒక అంతర్జాతీయ టెక్నాలజీ రిక్రూట్‌మెంట్ కంపెనీలో డెలివరీ మేనేజర్‌గా పనిచేస్తున్నట్టు పోలీసులు తెలిపారు. ఉన్నత స్థానంలో ఉండి కూడా ఇలాంటి చర్యకు పాల్పడటం విచారకరం. పోలీసులు అతడిని సోమవారం అరెస్ట్ చేసి, జ్యుడీషియల్ కస్టడీకి పంపారు. ఈ ఘటన సైబర్ వేధింపుల తీవ్రతను మరోసారి స్పష్టం చేసింది.
