రాష్ట్రంలో ఇంకా రుణమాఫీ ఎందుకు చేయలేదో రైతులకు సమాధానం చెప్పాలని కేంద్ర మంత్రి, బీజేపీ స్టేట్ చీఫ్ కిషన్ డిమాండ్ చేశారు. రైతుల పట్ల రాష్ట్ర ప్రభుత్వ తీరును నిరసిస్తూ బీజేపీ రాష్ట్ర అధ్యక్షుడు, కేంద్ర మంత్రి కిషన్ రెడ్డి దీక్ష చేపట్టారు. హైదరాబాద్‌లోని బీజేపీ రాష్ట్ర కార్యాలయంలో ఆయనకు దీక్షకు దిగారు. పార్టీ శ్రేణులతో కలిసి కిషన్‌రెడ్డి చేపట్టిన దీక్ష మధ్యాహ్నం మూడు గంటల వరకు కొనసాగనున్నట్లు పార్టీ వర్గాలు తెలిపాయి. ఈ సందర్భంగా కిషన్ రెడ్డి మాట్లాడుతూ.. ఎన్నికల వేళ కాంగ్రెస్ ఇచ్చిన హామీలు అమలు చేయాలని కిషన్ రెడ్డి డిమాండ్ చేశారు. 2 లక్షల రైతు రుణమాఫీ, రైతు భరోసా అందజేయాలని అన్నారు. అలాగే, మేనిఫెస్టోలో చెప్పినట్టుగా రైతు కూలీలందరికీ 12 వేల రూపాయలు ఇవ్వాలని పేర్కొన్నారు. వరికి 5 వందల రూపాయల బోనస్ అందించాలని కిషన్ రెడ్డి డిమాండ్ చేశారు. ఇటీవల దెబ్బతిన్న పంటలతో నష్టపోయిన రైతులకు 25 వేల రూపాయలు ఇవ్వాలన్నారు. ఎన్నికల్లో రైతులపై హామీల వర్షం కురిపించిన కాంగ్రెస్ పార్టీ అధికారంలోకి వచ్చాక ఆ ఊసే ఎత్తడం లేదని కిషన్ రెడ్డి మండిపడ్డారు. కాంగ్రెస్ పార్టీ మాటలకే కానీ చేతలకు కాదని ధ్వజమెత్తారు.
*ధాన్యం కొనుగోళ్లలో ప్రభుత్వానికి శ్రద్ధ లేదు..*
ఎన్నికల సమయంలో కాంగ్రెస్ ప్రకటించిన గ్యారంటీలకు ఎందుకు అమలు చేయడం లేదని ప్రజలు ప్రశ్నిస్తున్నారని అన్నారు. రైతులకు ఇచ్చిన గ్యారంటీల అమలకు ప్రణాళిక ఉందా అని నిలదీశారు. కొత్తగా తీసుకున్న అప్పులకు తాము అధికారంలోకి వచ్చిన తర్వాత డిసెంబర్ 9న రుణమాఫీ చేస్తామని ముఖ్యమంత్రి రేవంత్ రెడ్డి హామీ ఇచ్చారని ఈ సందర్భంగా గుర్తు చేశారు. మరి ఇంకా ఆ రుణమాఫీ ఎందుకు చేయలేదో చెప్పాలని డిమాండ్ చేశారు. రేవంత్ రెడ్డి మాటలు నమ్మ రైతులు రుణాలు తీసుకున్నారని చెప్పారు. పంట కోత సమయంలో రైతుల వద్ద డబ్బులు లేవన్నారు. రైతులకు బ్యాంక్‌లు రుణాలు ఇవ్వడం లేదని తెలిపారు. బీఆర్ఎస్ తెలంగాణ ప్రజలను వెన్నుపోటు పొడిచారని విమర్శించారు. గజదొంగలు పోయి.. ఘరానా దొంగలు వచ్చారని దుయ్యబట్టారు. మార్పు అన్నారు కానీ కేసీఆర్ కుటుంబం పోయి.. సోనియా గాంధీ కుటుంబం వచ్చిందని కామెంట్స్ చేశారు. ధాన్యం కొనుగోళ్లలో కాంగ్రెస్ ప్రభుత్వానికి శ్రద్ధ లేదని, తెలంగాణలో వసూళు చేసి ఢిల్లీలో ఇవ్వడానికి సమయం ఉంటుందని కిషన్ రెడ్డి దుయ్యబట్టారు.
