ఐపీఎల్ 2024లో సీఎస్కే నాలుగో విజయాన్ని నమోదు చేసింది. వాంఖడే వేదికగా జరిగిన మ్యాచ్లో ఆతిథ్య ముంబైని 20 పరుగుల తేడాతో ఓడించింది. మ్యాచ్ను గెలిపించేందుకు రోహిత్ శర్మ చేసిన ప్రయత్నం వృథాగా మారింది. హిట్మ్యాన్ సెంచరీతో సత్తాచాటినా మిగతా ప్లేయర్లు రాణించకపోవడంతో ముంబై ఓటమి పాలైంది. అటు సీఎస్కే బౌలర్ మతీశ పథిరన అదిరే బౌలింగ్తో ముంబై గెలుపు ఆశలకు గండికొట్టాడు.
ఇండియన్ ప్రీమియర్ లీగ్ 2024లో ముంబై ఇండియన్స్ను ఓడించి.. చెన్నై సూపర్ కింగ్స్ నాలుగో విజయాన్ని నమోదు చేసింది. భారీ స్కోర్లు నమోదైన ఈ మ్యాచ్లో ఆల్రౌండ్ ప్రదర్శనతో 20 పరుగుల తేడాతో విజయం సాధించింది. తొలుత బ్యాటింగ్ చేసిన సీఎస్కే 206/4 పరుగులు చేసింది. అనంతరం చెన్నైను 186/6 పరుగులకు పరిమితం చేసింది. ఈ మ్యాచ్లో రోహిత్ శర్మ (105) సెంచరీ చేసినా జట్టును గెలిపించలేకపోయాడు. మతీశ పథిరన సూపర్ బౌలింగ్తో చెన్నైకి విజయాన్ని అందించాడు.
207 పరుగుల భారీ లక్ష్యంతో బరిలోకి దిగిన ముంబై ఇండియన్స్.. ధాటిగా ఇన్నింగ్స్ను ప్రారంభించింది. ఈ సీజన్లో విశేషంగా రాణిస్తున్న ముంబై ఓపెనర్లు రోహిత్ శర్మ, ఇషాన్ కిషన్లు అదే జోరు కొనసాగించారు. దీంతో ముంబై 7 ఓవర్లలోనే వికెట్ నష్టపోకుండా 70 పరుగులు చేసి ఛేజ్కు గట్టి పునాది వేసింది. ఈ దశలో బౌలింగ్ చేసేందుకు వచ్చిన సీఎస్కే స్టార్ పేసర్ మతీశ పథిరన తొలి బంతికే ఇషాన్ కిషన్ (23) ఔట్ చేశాడు. గత మ్యాచ్లో హాఫ్ సెంచరీ చేసిన సూర్యకుమార్ యాదవ్ను పరుగుల ఖాతా తెరవకుండానే వెనక్కి పంపించాడు.
ఓవైపు రోహిత్ శర్మ నిలబడ్డా.. మిగతా ప్లేయర్లు అతడికి సహకరించకపోవడంతో ముంబై ఓటమి దిశగా సాగింది. సాధించాల్సిన రన్రేట్గా భారీగా పెరిగిపోవడంతో ఆ జట్టుకు ఓటమి తప్పలేదు. ఈ క్రమంలోనే రోహిత్ శర్మ 61 బంతుల్లో సెంచరీ మార్కును చేరుకున్నాడు. అయితే అప్పటికే ముంబై ఓటమి ఖరారైపోయింది. దీంతో రోహిత్ శర్మ సెంచరీ వృథాగా మారింది. మొత్తంగా ఈ మ్యాచ్లో 63 బంతులు ఆడిన హిట్మ్యాన్ 105 పరుగులతో నాటౌట్గా నిలిచాడు. ముంబై ఇండియన్స్ నిర్ణీత 20 ఓవర్లలో 186/6 పరుగులకు పరిమితమైంది. దీంతో చెన్నై సూపర్ కింగ్స్ 20 పరుగుల తేడాతో గెలుపొందింది. ఈ మ్యాచ్లో ఎంఎస్ ధోనీ 4 బంతుల్లో 20 పరుగులు చేయడం గమనార్హం.
ఈ మ్యాచ్లో చెన్నై సూపర్ కింగ్స్ విజయం సాధించడంలో మతీశ పథిరన కీలక పాత్ర పోషించాడు. సహచర బౌలర్లు భారీగా పరుగులు సమర్పించుకుంటున్నా.. పొదుపుగా బౌలింగ్ చేస్తూ వికెట్లు తీశాడు. భారీ స్కోర్లు నమోదైన ఈ మ్యాచ్లో 4 ఓవర్లలో 28 పరుగులు మాత్రమే ఇచ్చి 4 వికెట్లు పడగొట్టాడు. మ్యాచ్లో సీఎస్కే పైచేయి సాధించేలా చేశాడు.
