తెలంగాణ మలిదశ పోరాట తొలి అమరుడు కాసోజు శ్రీకాంతాచారి తల్లి శంకరమ్మ మంగళవారం సీఎం రేవంత్ రెడ్డిని కలిశారు. సచివాలయానికి వెళ్లిన ఆమె.. సీఎం రేవంత్ రెడ్డికి పుష్పగుచ్చం ఇచ్చి శుభాకాంక్షలు తెలిపారు. అందుకు సంబంధించిన ఫోటోను రేవంత్ రెడ్డి సోషల్ మీడియాలో పోస్టు చేశారు. అమరులు, ఉద్యమకారుల కుటుంబాలకు తమ ప్రభుత్వం అండగా ఉంటుందని సీఎం పేర్కొన్నారు. ఈ నేపథ్యంలో శంకరమ్మకు కాంగ్రెస్ ప్రభుత్వంలో కీలక పదవి కట్టబెట్టే ఛాన్స్ ఉన్నట్లు వార్తలు వినిపిస్తున్నాయి.
ఆమెకు ఎమ్మెల్సీగా అవకాశం కల్పించి చట్టసభలకు పంపించాలని సీఎం రేవంత్ రెడ్డి యోచిస్తున్నట్లు సమాచారం. తద్వారా బీఆర్ఎస్ పార్టీ అమరుల కుటుంబాలను మోసం చేసిందని.. తమ ప్రభుత్వమే అండగా ఉంటుందనే మెసేజ్ను ప్రజల్లోకి తీసుకెళ్లాలని ఆయన భావిస్తున్నార. తెలంగాణ ఉద్యమంలో పోరాటం చేసిన వారికి తమ ప్రభుత్వం అండగా ఉంటుందని రేవంత్ రెడ్డి పలుమార్లు చెప్పారు. అందులో భాగంగానే ఆరు గ్యారంటీల్లో భాగంగా ఇందిరమ్మ ఇండ్లకు దరఖాస్తులు తీసుకునే ఫారంలో ప్రత్యేకంగా వారికి ఓ కాలం పెట్టారు కూడా. అమరులు, ఉద్యమకారులు తమ కేసుల వివరాలు వెల్లడిస్తే.. ప్రత్యేకంగా ఇండ్లు కేటాయించటంతో పాటు అమరుల కుటుంబాలకు పింఛన్లు కూడా మంజూరు చేస్తామన్నారు.
అమరుల ప్రతినిధిగా శంకరమ్మను చట్టసభలకు పంపించేందుకు కాంగ్రెస్ ప్రభుత్వం సముఖకంగా ఉందనే వార్తలు వినిపిస్తున్నాయి. ప్రస్తుతం ఆరు ఎమ్మెల్సీ స్థానాలు ఖాళీగా ఉండగా.. గవర్నర్ లేదా ఎమ్మెల్యేల కోటాలో ఆమెకు ఎమ్మెల్సీగా అవకాశం కల్పిస్తారనే ప్రచారం జరుగుతోంది.
ఇక తెలంగాణ ఏర్పాటు తర్వాత.. 2014 అసెంబ్లీ ఎన్నికల్లో శంకరమ్మ హుజూర్నగర్ నుంచి టీఆర్ఎస్ నుంచి పోటీ చేసి ఓడిపోయారు. 2018 ఎన్నిక ఉత్తమ్ రాజీనామాతో ఆ తర్వాత వచ్చిన ఉప ఎన్నికల్లో శంకరమ్మను పక్కకు పెట్టి ఎన్ఆర్ఐ సైదిరెడ్డికి ఎమ్మెల్యే టికెట్ ఇచ్చారు. దీంతో ఆమె అసంతృప్తికి గురయ్యారు. తనకు న్యాయం చేయాలంటూ సీఎం కేసీఆర్, కేటీఆర్ను పలుమార్లు కోరారు. వివిధ వేదికలపై తనతో పాటు తెలంగాణ అమరవీరుల కుటుంబాలకు అన్యాయం జరిగిందని శంకరమ్మ బహిరంగంగా ప్రకటించారు. ఈ నేపథ్యంలో గత ఏడాది అసెంబ్లీ ఎన్నికల సమయంలో బీఆర్ఎస్ దగ్గరతు తీసినా.. పదవి ఇవ్వలేదు. దీంతో కొత్తగా వచ్చిన కాంగ్రెస్ పార్టీ ఆమెను చట్టసభలకు పంపి.. అమరుల పక్షాన నిలిచేది కాంగ్రెస్ పార్టీయే అని చెప్పేందుకు వ్యూహత్మకంగా అడుగులు వేస్తున్నట్లు తెలుస్తోంది.
