తెలంగాణలో నేడు, రేపు వర్షాలు పడనున్నాయని హైదరాబాద్ వాతావరణ కేంద్రం స్పష్టం చేసింది. ఇవాళ భద్రాద్రి కొత్తగూడెం, ఖమ్మం, నల్లగొండ, సూర్యాపేట, మహబూబాబాద్, మహబూబ్నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల్ జిల్లాల్లో అక్కడక్కడ ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉందని తెలిపింది. ఈదురుగాలులు గంటకు 30 నుంచి 40 కిలోమీటర్ల వేగంతో వీచే అవకాశం ఉందని పేర్కొంది.
10వ తేదీన సిద్దిపేట, యాదాద్రి భువనగిరి, రంగారెడ్డి, హైదరాబాద్, మేడ్చల్ మల్కాజ్గిరి, వికారాబాద్, సంగారెడ్డి, మెదక్, కామారెడ్డి, మహబూబ్నగర్, నాగర్ కర్నూల్, వనపర్తి, నారాయణపేట, జోగులంబ గద్వాల్ జిల్లాల్లో పలుచోట్ల తేలికపాటి నుంచి ఒక మోస్తరు వానలు పడతాయని అంచనా వేసింది. ఇక నేడు, రేపు పలు జిల్లాల్లో వడగాల్పులు కూడా వీయనున్నాయని వాతావరణశాఖ అధికారులు హెచ్చరించారు. ఇవాళ నల్లగొండ, ఖమ్మం, సూర్యాపేట, భద్రాద్రి కొత్తగూడెం, నిర్మల్, మంచిర్యాల, కొమరం భీం ఆసిఫాబాద్, ఆదిలాబాద్ జిల్లాల్లో వడగాల్పులు వీస్తాయని హెచ్చరికలు జారీ చేశారు.
ఇక రేపు ఆదిలాబాద్, కొమరం భీం ఆసిఫాబాద్, మంచిర్యాల, నిర్మల్, ఖమ్మం, భద్రాద్రి కొత్తగూడెం, సూర్యాపేట, నల్లగొండ జిల్లాల్లో అక్కడక్కడ వడగాల్పులు వీస్తాయని వాతావరణశాఖ హెచ్చరించింది. వడగాల్పుల దృష్ట్యా ప్రజలు అప్రమత్తంగా ఉండాలని, గర్భిణీలు, వృద్ధులు, చిన్నారులు జాగ్రత్తగా ఉండాలని సూచించింది. అటు 11వ తేదీ నుంచి 13వ తేదీ వరకు రాష్ట్రంలోని కొన్ని జిల్లాల్లో పలు ప్రాంతాల్లో వర్షసూచనలు కనిపిస్తున్నట్లు తెలిపింది.
