బాలీవుడ్ స్టార్ హీరో రణ్వీర్ సింగ్ ప్రధాన పాత్రలో, ఆదిత్య ధర్ దర్శకత్వంలో తెరకెక్కిన భారీ యాక్షన్ ఎంటర్టైనర్ ‘ధురంధర్ 2’ (ధురంధర్ ది రివెంజ్) ఇటీవల ప్రపంచవ్యాప్తంగా విడుదలైంది. ఈ సినిమాపై టాలీవుడ్ అగ్ర తారలైన అల్లు అర్జున్, మహేశ్ బాబు, జూనియర్ ఎన్టీఆర్ వంటి వారు సోషల్ మీడియా వేదికగా ప్రశంసలు కురిపించారు. అయితే, దక్షిణాది హీరోలందరూ ఒకేసారి ఈ చిత్రంపై స్పందించడంపై నెటిజన్లతో పాటు నటుడు ప్రకాశ్ రాజ్ కూడా తనదైన శైలిలో అనుమానం వ్యక్తం చేశారు.
ఒక నెటిజన్ సోషల్ మీడియాలో స్పందిస్తూ.. “సౌత్ స్టార్లు ఇంతగా పొగుడుతున్నారు కానీ, బాలీవుడ్ నుంచి ఒక్కరైనా ఈ సినిమా గురించి మాట్లాడారా?” అని ప్రశ్నించిన పోస్ట్కు ప్రకాశ్ రాజ్ కౌంటర్ ఇచ్చారు. ఈ ప్రశంసల వెనుక ఉన్నది నిజమైన అభిమానమేనా, లేక ఏవైనా రాజకీయ లేదా వాణిజ్య పరమైన ఒత్తిళ్లు ఉన్నాయా అనే అర్థం వచ్చేలా ఆయన వ్యాఖ్యానించారు. “ఈ ‘బాధ్యతల’ సంకేతాలు దక్షిణాదికి కూడా పాకుతున్నాయి.. #జస్ట్ఆస్కింగ్” అంటూ పరోక్షంగా చురకలు అంటించారు.
సాధారణంగా బాలీవుడ్ సినిమాలను దక్షిణాది హీరోలు అభినందించడం సహజమే అయినా, అందరూ ఒకేసారి స్పందించడం వెనుక ఏదైనా బలమైన కారణం ఉండి ఉంటుందని నెటిజన్లు కూడా చర్చిస్తున్నారు. ప్రకాశ్ రాజ్ తన మార్కు వ్యంగ్యంతో చేసిన ఈ కామెంట్ ఇప్పుడు సినీ వర్గాల్లో హాట్ టాపిక్గా మారింది. ఈ సినిమాకు బాక్సాఫీస్ వద్ద మంచి స్పందన వస్తున్నప్పటికీ, ఈ ‘ట్వీట్ల’ యుద్ధం మాత్రం సోషల్ మీడియాలో వేడిని పుట్టిస్తోంది.
