శ్రీ సత్యసాయి బాబా శత జయంతి ఉత్సవాలు పుట్టపర్తిలో వైభవంగా జరుగుతున్న వేడుకల్లో క్రికెట్ దిగ్గజం సచిన్ టెండూల్కర్ పాల్గొన్నారు. ఈ సందర్భంగా ఆయన తన ప్రసంగంలో బాబాతో తనకు ఉన్న ఆధ్యాత్మిక అనుబంధాన్ని, ఆయన మార్గదర్శకతను గుర్తు చేసుకుని భావోద్వేగంతో మాట్లాడారు. చిన్ననాటి నుంచి బాబా పట్ల తనకు ప్రత్యేకమైన అనుబంధం ఉందని, ఐదో తరగతిలో ఉన్నప్పుడు తన జుట్టును చూసి స్నేహితులు బాబాతో పోల్చేవారని చమత్కరించారు. 1990ల ప్రారంభంలో వైట్ ఫీల్డ్‌లో సత్యసాయి బాబాను మొదటిసారి కలిసిన అనుభవాన్ని ప్రత్యేకంగా ప్రస్తావించారు.
బాబాతో జరిగిన భేటీల్లో తాను అనేక విషయాలు నేర్చుకున్నానని సచిన్ తెలిపారు. “నా మనసులో ఉన్న ప్రశ్నలు అడగకుండానే బాబా సమాధానమిచ్చేవారు. ప్రజలను జడ్జ్ చేయొద్దు, వారిని అర్థం చేసుకోండి” అనే ఆయన బోధన తన మనసులోని అనేక సందేహాలను తొలగించిందని సచిన్ అన్నారు. సత్యసాయి బాబా జీవితమంతా సేవకు అంకితం చేశారని, ముఖ్యంగా బలహీన వర్గాల కోసం చేయూతనిచ్చే విధానమే నిజమైన గెలుపుగా ఆయన భావించారని గుర్తు చేశారు. శారీరక ఆరోగ్యంతో పాటు మానసిక ఆరోగ్యానికి కూడా బాబా ఇచ్చిన ప్రాముఖ్యతను సచిన్ ప్రశంసించారు.
సచిన్ టెండూల్కర్ తన జీవితంలో 2011 ప్రపంచ కప్‌ను గెలిచిన సందర్భాన్ని **”గోల్డెన్ మూమెంట్”**గా అభివర్ణించారు. ఆ సమయంలో తన మదిలో ఆనందం, ఒత్తిడి, భావోద్వేగాలు నిండిపోయి ఉండేవని తెలిపారు. “ఆ సమయంలో నేను బెంగళూరులో ఉన్నా. అప్పుడు సత్యసాయి బాబా నాకు ఫోన్ చేశారు. అనంతరం ఒక పుస్తకం పంపించారు. ఆ పుస్తకం నాలో అపారమైన ధైర్యాన్ని నింపింది. ప్రాక్టీస్‌ నుంచి మైదానం వరకు అది నా వెంటనే ఉండేది” అని సచిన్ తెలిపారు. వరల్డ్ కప్ సాధనలో బాబా ఆశీస్సుల పాత్ర ఎంతో ఉందని సచిన్ నొక్కి చెప్పారు.
