ప్రతిపక్షాలపై ముఖ్యమంత్రి జగన్ తీవ్ర స్థాయిలో విరుచుకుపడ్డారు. ఫ్యాన్ ఎప్పుడు ఇంట్లోనే ఉండాలి.. సైకిల్ ఎప్పుడు బయటనే ఉండాలని.. అలాగే తాగేసిన టీ గ్లాస్ ఎప్పుడు సింక్‌లోనే ఉండాలని ఎద్దేవా చేశారు. ఆదివారం రాప్తాడులో వైసీపీ నిర్వహించిన ’సిద్ధం’ సభలో ఆయన పాల్గొన్నారు. ఈ సందర్భంగా సీఎం జగన్ మాట్లాడుతూ.. రాప్తాడులో జనసముద్రం కనిపిస్తుందని అన్నారు. ఇవి ఎన్నుకునే ఎన్నికలు కావని, పేదలకు, పెత్తందారులకు మధ్య జరిగే యుద్ధం అంటూ వ్యాఖ్యానించారు. ఓవైపు పేదలు.. మరోవైపు పెత్తందారులు ఎన్నికల్లో ఉన్నారన్నారు. ఈ ఎన్నికల్లో పేదల తరఫున నిలబడడానికి మీరు సిద్ధమేనా అని ప్రశ్నించారు. నాన్ రెసిడెంట్ ఆంధ్రులకు.. మనకు మధ్య యుద్ధం జరగనుందన్నారు. చంద్రబాబు ముఖ్యమంత్రిగా 14 ఏళ్లు పనిచేశారని, ఆయన పేరు చెబితే గుర్తుకు వచ్చే పథకం ఏది లేదని చెప్పారు. చంద్రబాబు పేరు చెబితే మహిళలకు, రైతులకు అవ్వా తాతలకు గుర్తుకు వచ్చే పథకం ఏమీ లేదని ఆరోపించారు. కుప్పం నుంచి ఇచ్ఛాపురం వరకు చంద్రబాబు మార్కు కనిపించదన్నారు. ఆయన పేరు చెప్పిన రాష్ట్రంలో సామాజిక న్యాయం ఎవరికీ గుర్తుండదు.. మేనిఫెస్టోలో చంద్రబాబు ఇచ్చిన హామీలను ఎప్పుడు అమలు చేయలేదన్నారు.
బాబు పేరు చెబితే గుర్తుకు వచ్చే హామీలు లేవు
రంగు రంగుల హామీలతో ప్రజలను ఎప్పుడు మోసం చేసేందుకు సిద్ధమయ్యారని విమర్శించారు. నమ్మినవాడు.. మునుగుతాడు, నమ్మించిన వాడు.. దోచుకుంటాడు ఆదే చంద్రబాబు సిద్ధాంతం అంటూ కామెంట్స్ చేశారు. చంద్రబాబు అబద్ధాలను ప్రతి ఇంటికి వెళ్లి చెప్పాలని సూచించారు. వాలంటీర్లు, వైసీపీ కార్యకర్తలు ఈ విషయాన్ని ప్రజలకు చెప్పాలన్నారు. 57 నెలల వైసీపీ పాలనలో ఎన్నో మార్పులు తీసుకువచ్చామని, విప్లవాత్మక మార్పులు ఇంకా కొనసాగించాలని, ఈ విషయాన్ని ప్రతి ఇంట్లో వివరించాలన్నారు. మరోసారి మీరంతా చొక్కా మడతేయడానికి సిద్ధంగా ఉన్నారా అని నిలదీశారు. గత ఎన్నికల్లో చొక్క మడతపెట్టి టీడీపీని 23 సీట్లకు పరిమితం చేశారని, ఇప్పుడు కూడా చంద్రబాబును ఇంటికి పంపేందుకు సిద్ధంగా ఉన్నారని పేర్కొన్నారు. ప్రజలు అధికారం ఇస్తే రాష్ట్రంలో ఇన్ని పనులు చేశామని, అలాగే ప్రజలు మళ్లీ ఆశీర్వదిస్తే మరిన్ని మంచి పనులు చేస్తామన్నారు. లంచాలకు తావులేకుండా పేదల ఖాతాల్లోకి నగదు బదిలీ చేశామని చెప్పారు. వైసీపీ అధికారంలో 57 నెలల్లో 2 లక్షల 13 వేల ఉద్యోగాలు ఇచ్చామన్నారు. ఇందులో 80 శాతం ఉద్యోగాలు ఎస్సీ, ఎస్టీ, మైనార్టీ, బీసీలకు ఇచ్చామని చెప్పారు. తాము మేనిఫెస్టోలో పెట్టిన 90 శాతం హామీలను అమలు చేశామని పేర్కొన్నారు. మూడుసార్లు ముఖ్యమంత్రి అయిన చంద్రబాబు ఎందుకు చేయలేదని ప్రశ్నించారు. అసలు చంద్రబాబుకు ఓటు ఎందుకు వేయాలని ప్రశ్నించారు. వైసీపీ మార్క్ ప్రతి ఇంట్లో, ప్రతి గ్రామంలో కనిపిస్తుందని చెప్పారు.
పొరపాటు చేస్తే చంద్రముఖి మళ్లీ వస్తుంది
జగన్‌కు ప్రజాబలం లేకపోతే చంద్రబాబుకు పొత్తులెందుకని నిలదీశారు. సైకిల్ తొయ్యడానికి ప్యాకేజ్ స్టార్ ఎందుకు అంటూ జనసేన పార్టీ అధినేత పవన్ కళ్యాణ్‌పై విమర్శలు చేశారు. ఎన్నికల్లో పొరపాటు చేస్తే మళ్లీ చంద్రముఖి వస్తుందని నవ్వులు పూయించారు. ఇక్కడ ఉన్నది అభిమన్యుడు కాదు.. అర్జునుడు అని చెప్పారు. ఈ అర్జునుడిని నడిపించేందుకు ఎంతమంది కృష్ణులు ఉన్నారని ముఖ్యమంత్రి జగన్ పేర్కొన్నారు. ప్రజలు రెండు బటన్లు నొక్కాలని, ఒకటి అసెంబ్లీకి మరోకటి పార్లమెంట్‌కు అని ఫ్యాన్ గుర్తుపై నొక్కాలని చెప్పారు. వచ్చే ఎన్నికల్లో 175కు 175 సీట్లు మన టార్గెట్ అని, అలాగే 25 ఎంపీ సీట్లు మన టార్గెట్ అని ముఖ్యమంత్రి జగన్ ప్రసంగించారు.
