ఎన్నికల్లో ప్రధానమైంది మేనిఫెస్టో. తాము అధికారంలోకి వస్తే ఏం చేయబోయే అంశాలను వెల్లడిస్తూ పార్టీలు మేనిఫెస్టో రిలీజ్ చేస్తాయి. ఇదే వారి గెలుపునకు దోహదం చేస్తుంది. ఏ పార్టీ ప్రజల్ని ఆకట్టుకునేలా మేనిఫెస్టో రూపొందిస్తే.. ఆ పార్టీకే ప్రజలు పట్టంకట్టే అవకాశాలు ఎక్కువ. దీంతో ఈనెల 16న వరంగల్ సభతో పార్టీ మేనిఫెస్టో విడుదల చేసేందుకు బీఆర్ఎస్ పార్టీ సిద్ధమైంది. ఇప్పటికే అమలు చేస్తున్న పథకాలతో పాటు కొత్త పథకాలు అమలు చేసేందుకు రెడీ అయింది.
ఇక కాంగ్రెస్ పార్టీ ఇప్పటికే రైతు డిక్లరేషన్, యూత్ డిక్లరేషన్, ఎస్సీ డిక్లరేషన్లతో పాటు ఆరు గ్యారంటీలను వెల్లడించింది. మహాలక్ష్మి స్కీమ్, రైతుభరోసా, గృహజ్యోతి, ఇందిరమ్మ ఇండ్లు, యువ వికాసం, చేయూత వంటి పథకాలు ఈ ఆరు గ్యారంటీల్లో ఉన్నాయి. అయితే.. గ్రేటర్ హైదరాబాద్కు ప్రత్యేకంగా మేనిఫెస్టో విడుదల చేయాలని కాంగ్రెస్ పార్టీ నిర్ణయించింది. ఇందుకోసం సబ్ కమిటీ ఏర్పాటు చేయనుంది. మ్యానిఫెస్టో కమిటీ ఛైర్మన్, ఎమ్మెల్యే దుద్దిళ్ల శ్రీధర్బాబు అధ్యక్షతన ఈ మేరకు మంగళవారం (అక్టోబర్ 3) గాంధీభవన్లో కమిటీ సమావేశం జరిగింది. గ్రేటర్ హైదరాబాద్లోని ప్రధాన సమస్యలు, ఏయే హామీలు చేర్చాలనే అంశాలపై ఈ భేటీలో చర్చించారు.
విద్యార్థులకు ఉచిత మెట్రో ప్రయాణం కల్పించాలనే విషయం సమావశంలో చర్చకు వచ్చినట్లు తెలిసింది. ఈ అంశాన్ని ఎన్నికల మేనిఫెస్టో చేర్చాలని నిర్ణయించినట్లు సమాచారం. అయితే అన్ని రోజులు కాకుండా.. పరీక్షలు జరిగే రోజుల్లో మాత్రమే స్టూడెంట్స్కు ఫ్రీ మెట్రో జర్నీ సౌకర్యం కల్పించాలని డిసైడ్ అయినట్లు తెలిసింది. అలాగే రేషన్ దుకాణాలను సూపర్ మార్కెట్లుగా మార్చి.. సన్న బియ్యంతో పాటు ప్రభుత్వం నిర్ణయించిన ధరలకు నిత్యావసరాలు అందుబాటులో ఉంచే అంశంపైనా భేలో చర్చ జరిగింది.
రాజస్థాన్లో అమలు చేస్తున్న క్యాబ్ డ్రైవర్ల పాలసీని కూడా తెలంగాణలో అమలు చేసే అంశాన్ని మేనిఫెస్టోలో చేర్చాలని ఆ సంఘం ప్రతినిధులు శ్రీధర్ బాబును కలిసి విన్నవించారు. దీనిపై ఆయన సానుకూలంగా స్పందించారు. కాంగ్రెస్ పార్టీ మేనిఫెస్టో రూపకల్పనకు ప్రజాభిప్రాయం సేకరిస్తుంది. గ్రౌండ్లో లెవల్లో పర్యటిస్తూ.. ప్రజలు కోరుకున్న మేనిఫెస్టోను రూపొందించేదుకు కసరత్తు చేస్తున్నారు. అభ్యర్థుల ప్రకటన తర్వాత మేనిఫెస్టో రిలీజ్ చేయనున్నట్లు ఆ పార్టీ వర్గాలు వెల్లడించాయి.
