కాంగ్రెస్ 5 గ్యారంటీ హామీలు ఇవే..!
ప్రజల సలహాలతోనే కాంగ్రెస్ మేనిఫెస్టో
తెలంగాణలో ఎన్నికలు దగ్గరపడుతుండటంతో అన్ని పార్టీలు తమ వ్యుహాలకు పదునుపెడుతున్నాయి. అధికార బీఆర్ఎస్ సంక్షేమ పథకాల అమలులో స్పీడ్ పెంచగా.. ప్రతిపక్షాలు ప్రజల్ని ఆకట్టుకునేలా మేనిఫెస్టో రూపొందించే పనిలో నిమగ్నమయ్యాయి. ఈ విషయంలో కాంగ్రెస్ పార్టీ ఒకడుగు ముందే ఉంది. ఇప్పటికే రైతు డిక్లరేషన్, నిరుద్యోగ డిక్లరేషన్ ప్రకటించింది. ఇక వచ్చే ఎన్నికల్లో కాంగ్రెస్ గెలిచాక అమలుచేసే 5 ప్రధాన హామీల గ్యారంటీ పత్రాన్ని ఈ నెల 17న తుక్కుగూడలో నిర్వహించే విజయభేరి బహిరంగ సభలో సోనియాగాంధీ విడుదల చేస్తారని ఇప్పటికే పీసీసీ అధ్యక్షుడు రేవంత్రెడ్డి ప్రకటించారు.
ప్రజలకు మేలు చేసేలా, అమలు చేయగలిగే పథకాలు, హామీలనే మేనిఫెస్టోలో పెట్టాలని కాంగ్రెస్ పార్టీ నిర్ణయించింది. ఇటీవల ఏఐసీసీ ఏర్పాటు చేసిన మేనిఫెస్టో కమిటీ మంగళవారం (సెప్టెంబర్ 12న) గాంధీభవన్లో తొలి సమావేశాన్ని నిర్వహించింది. ఇప్పటికే వివిధ వర్గాల కోసం డిక్లరేషన్లను ప్రకటించిన పార్టీ.. మేనిఫెస్టోలో పెట్టాల్సిన ఎన్నికల హామీలపై నేరుగా ప్రజల నుంచే అభిప్రాయం తీసుకోవాలని నిర్ణయించినట్లు తెలిసింది. హామీలు ఎలా ఉండాలన్న దానిపై కమిటీ సభ్యులు, పార్టీ సీనియర్ నేతలు చర్చించారు. విజయభేరి సభలో ఐదు గ్యారెంటీలే కాకుండా.. ఇంకెన్ని హామీలు అమలు చేస్తే బాగుంటుందో చర్చించినట్లు సమాచారం.
అయితే సోనియాగాంధీ ప్రకటించే వరకు గ్యారంటీ హామీలు ఏమిటనేది బయటకు చెప్పవద్దని నేతలు ఒక అభిప్రాయానికి వచ్చారు. పార్టీవర్గాల విశ్వసనీయ సమాచారం మేరకు ఐదు గ్యారంటీలు ఇవేనని ప్రచారం జరుగుంతుంది.
అందులో..
1) మహిళలకు రూ.500కే గ్యాస్ సిలిండర్
2) ఆర్టీసీ బస్సుల్లో ఉచిత ప్రయాణం
3) రైతులకు రూ.2 లక్షల రుణమాఫీ
4) యువతకు ఉద్యోగాల భర్తీ, విద్యార్థులకు ఫీజు రీయింబర్స్మెంట్ స్కీం పునరుద్ధరణ
5) బీసీ, మైనార్టీ సబ్ప్లాన్ ఏర్పాటు
భేటీ అనంతరం మీడియాతో మాట్లాడిన ఏఐసీసీ కార్యదర్శి శ్రీధర్బాబు ప్రజలు కోరుకునేవన్నీ మేనిఫెస్టోలో ఉంటాయన్నారు. ప్రజల జీవితాల్లో మార్పు వచ్చేలా కాంగ్రెస్ మేనిఫెస్టో ఉంటుందని వెల్లడించారు. వాగ్దానాలకే పరిమితం కాకుండా అమలుకు సాధ్యమయ్యే వాటినే మేనిఫెస్టో ఇవ్వాలని భావించామన్నారు. ప్రజలు తమ సలహాలు, సూచనలను గాంధీభవన్లో ఏర్పాటు చేయనున్న కంట్రోల్రూం, టోల్ ఫ్రీ నంబరుకు తెలపాలని ఆయన కోరారు.
