తెలంగాణకు ఐదు రోజుల పాటు వర్షసూచన..
కొద్దిరోజులుగా నిప్పులు కక్కే భానుడి భగభగలతో ఉక్కిరిబిక్కిరి అవుతున్న తెలంగాణ ప్రజలకు హైదరాబాద్ వాతావరణ కేంద్రం చల్లని కబురు తెలిపింది. రాష్ట్రంలో రాబోయే ఐదు రోజుల పాటు వానలు కురిసే అవకాశముందని అంచనా వేసింది. 19వ తేదీ నుంచి 23వ తేదీ వరకు రాష్ట్రంలోని పలు జిల్లాల్లో వర్షాలు పడతాయని స్పష్టం చేసింది. ఈ మేరకు గురువారం రాత్రి హైదరాబాద్ వాతావరణ కేంద్రం అధికారులు వెదర్ బులిటెన్ విడుదల చేశారు.
ఇవాళ నల్లగొండ, భద్రాద్రి కొత్తగూడెం, ములుగు, జయశంకర్ భూపాలపల్లి, మంచిర్యాల, రాజన్న సిరిసిల్ల జిల్లాల్లో ఉరుములు, మెరుపులతో కూడిన తేలికపాటి నుంచి ఓ మోస్తరు వర్షాలు అక్కడక్కడ కురుస్తాయని అంచనా వేసింది. 20, 21వ తేదీల్లో వనపర్తి, నాగర్ కర్నూల్, యాదాద్రి భువనగిరి, నల్లగొండలో పలుచోట్ల వర్షాలు పడతాయని తెలిపింది. ఇక 22వ తేదీ ఖమ్మం, నల్లగొండ, సూర్యాపేట, యాదాద్రి భువనగిరి, రంగారెడ్డి, వికారాబాద్, మహబూబ్నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల్ జిల్లాల్లో వానలు పడతాయని వాతావరణ కేంద్రం పేర్కొంది.
ఇక 23వ తేదీ కామారెడ్డి, మహబూబ్ నగర్, నాగర్ కర్నూల్, వనపర్తి, నారాయణపేట, జోగులాంబ గద్వాల్, మెదక్, సంగారెడ్డి, వికారాబాద్, మేడ్చల్ మల్కాజ్గిరి, హైదరాబాద్, రంగారెడ్డి, యాదాద్రి భువనగిరి, మహబూబాబాద్, సూర్యాపేట, నల్లగొండ, ఖమ్మం జిల్లాలో అక్కడక్కడ వానలు కురుస్తాయని వాతావరణశాఖ అధికారులు చెప్పారు. అలాగే హైదరాబాద్లో కూడా ఆకాళం పాక్షికంగా మేఘావృతమై ఉంటుందని పేర్కొన్నారు.
