తల్లిలేని పసిపాప ఆకలి తీర్చడానికి ఓ ఆదివాసీ కుటుంబం పడుతున్న బాధలను చూసి.. ఆరోగ్య మంత్రి మంత్రి హరీష్ రావు చలించిపోయారు. ఆదిలాబాద్‌ జిల్లా రాజుగూడకు చెందిన కొడప పారుబాయి మరణించగా.. ఆమెకు జన్మించిన పసికందుకు అవసరమయ్యే పాలకోసం కుటుంబ సభ్యులు పడుతున్న యాతన గురించి తెలుసుకున్న హరీష్.. ఆ పసిపాప కుటుంబానికి సొంతంగా పాడి ఆవును అందజేశారు. ఆ బిడ్డకు పాల సమస్య తీర్చారు. మంత్రి హరీష్ రావు (Harish Rao) ఆదేశాలతో.. అధికారులు ఆవును కొనుగోలు చేసి రాజుగూడలో ఆ పసిపాప తాత బాపురావుకు అప్పగించారు.
జిల్లా న్యాయ సేవాధికార సంస్థ కార్యదర్శి క్షమా దేశ్‌పాండే, ఇంద్రవెల్లి ఎస్‌ఐ డి.సునీల్‌, అంకోలి పీహెచ్‌సీ వైద్యుడు రాహుల్‌ రాజుగూడలో పాపకు దుస్తులు, పాల డబ్బాలు, ఇతర సామగ్రి అందించారు. పసికందును శిశు విహార్‌కు పంపించాలని జిల్లా బాలల పరిరక్షణ విభాగం సీడీపీఓ రాజేంద్రప్రసాద్‌ కుటుంబ సభ్యులకు సూచించారు. బీడీఎల్‌ ఇన్నర్స్‌ ఫౌండేషన్‌ తెలుగు రాష్ట్రాల సమన్వయకర్త రఘుతోపాటు పలువురు దాతలు కూడా పసికందును ఆదుకోవడానికి ముందుకొచ్చారు.
ఆదిలాబాద్‌ జిల్లా ఆదిలాబాద్‌ గ్రామీణ మండలంలోని రాజుగూడకు చెందిన కొడప పారుబాయి.. జనవరి 10న ఇంద్రవెల్లి పీహెచ్‌సీలో ఆడ బిడ్డకు జన్మనిచ్చింది. కుటుంబ సభ్యులు పారుబాయితో పాటు పసికందును మరుసటి రోజున గూడేనికి తీసుకెళ్లారు. అయితే.. కేవలం పది రోజులకే తల్లి పారుబాయి అనారోగ్యంతో మృతిచెందింది. అప్పటి నుంచి ఆ పసిగుడ్డు ఆకలి తీర్చేందుకు తండ్రి జంగుబాబు, తాత బాపురావు పడరాని పాట్లు పడుతున్నారు.
వారిద్దరిలో ఎవరో ఒకరు ప్రతిరోజూ రాజుగూడ నుంచి 3 కిలోమీటర్ల దూరంలోని చిద్దరి ఖానాపూర్‌ వరకు కాలినడకన వచ్చి.. అక్కడి నుంచి 7 కిలోమీటర్ల దూరంలోని ఇంద్రవెల్లికి వాహనాల్లో వెళ్లి పాల ప్యాకెట్‌ తీసుకొస్తున్నారు. ఈ గూడెంలో ఎవరికి పాలిచ్చే పశువులు లేవు. కనీసం పసిపాప ఆకలి తీర్చడానికైనా ఆవు మంజూరు చేయాలని.. ఉట్నూరు ఐటీడీఏ కార్యాలయంలో నెల రోజుల కిందట దరఖాస్తు చేసుకున్నారు. కానీ.. ఇప్పటి వరకూ మంజూరు కాలేదు. దీంతో ఆ పసిపాప ఆకలి తీర్చడానికి కుటుంబసభ్యులు తీవ్ర ఇబ్బందులు పడుతున్నారు.
ఈ విషయం మంత్రి హరీష్ రావు దృష్టికి వెళ్లింది. వెంటనే స్పందించిన మంత్రి.. ఆవును వారికి అప్పగించాలని.. పాప ఆకలి బాధల తీర్చాలని ఆదేశించారు. హరీష్ రావు ఆదేశాలతో కదిలిన అధికారులు.. వారి దగ్గరికి వెళ్లి ఆవును అందించారు. దీంతో వారి సమస్య తీరింది. వారు మంత్రి హరీష్ రావుకు కృతజ్ఞతలు చెప్పారు.
