రేవంత్ రెడ్డి సర్కార్ మరో సరికొత్త రికార్డు క్రియేట్ చేసింది. అధికారం చేపట్టిన తొలి ఏడాదిలోనే సుమారు రూ.830 కోట్ల సీఎం రిలీఫ్ ఫండ్స్ విడుదల చేసి.. రికార్డు నెలకొల్పింది. రాష్ట్రంలోని లక్షా 66 వేల మంది.. పేద, మధ్యతరగతి కుటుంబాలు సీఎంఆర్ఎఫ్తో లబ్ధి పొందినట్టు సీఎంవో ఆదివారం (డిసెంబర్ 01) రోజున ప్రకటించింది. గత బీఆర్ఎస్ ప్రభుత్వం.. 2018 నుంచి 2023 వరకు ఐదేళ్లలో.. రూ.2400 కోట్ల సీఎం రిలీఫ్ ఫండ్ విడుదల చేసినట్టుగా పేర్కొంది. అంటే సగటున ఏడాదికి రూ.480 కోట్లు గత ప్రభుత్వం ఖర్చు పెడితే.. రేవంత్ రెడ్డి ప్రభుత్వం తొలి ఏడాదిలోనే రూ.830 కోట్ల సాయం అందించి.. తన ఔదార్యాన్ని చాటుకున్నారని పేర్కొంది. ఈ ఏడాది విడుదల చేసిన రూ.830 కోట్లలో ఇప్పటికే రూ.590 కోట్లు సీఎంఆర్ఎఫ్ ద్వారా సాయం అందించినట్టు సీఎంవో స్పష్టం చేసింది.
ఆరోగ్య శ్రీ పరిధిలో లేని చికిత్సలు, ఆర్థిక స్థోమత లేని పేద కుటుంబాలకు ఖరీదైన వైద్యం అందించేందుకు ప్రజా ప్రతినిధుల సిఫారసు మేరకు సర్కార్ ఈ సాయం అందిస్తున్న విషయం తెలిసిందే. అయితే.. జిల్లా స్థాయిలో అవసరమైన వైద్య చికిత్స సదుపాయం లేని పరిస్థితుల్లో నిమ్స్‌తో పాటు ఎంఎన్జే క్యాన్సర్ ఆసుపత్రి, నిలోఫర్, ఈఎన్టీ, ఉస్మానియా, గాంధీ ఆసుపత్రుల్లో సీఎంఆర్ఎఫ్ ద్వారా చికిత్స అందిస్తున్నారు. ఇందుకు అయ్యే అంచనా ఖర్చును ప్రభుత్వమే భరిస్తుంది.
సీఎం సహాయ నిధి నుంచి సంబంధిత ఆసుపత్రికి ఎల్వోసీ (లెటర్ ఆఫ్ క్రెడిట్) జారీ చేస్తుంది. ఈ ఏడాదిలోనే 13 వేల మందికి ఎల్వోసీలు జారీ చేసింది. సుమారు రూ.240 కోట్ల ఎల్వోసీలు మంజూరు చేశారు. ఇందులో అత్యధికంగా చిన్న పిల్లలకు అవసరమయ్యే ఆపరేషన్లు, చికిత్సలకు కేటాయించారు. దరఖాస్తు చేసుకున్న 24 గంటల్లోనే ఎల్వోసీ ఇచ్చే ఏర్పాట్లు చేసింది. ఒక్కరోజు కూడా ఆలస్యం చేయవద్దని, ఆదివారంతో పాటు సెలవు దినాల్లో కూడా ఎల్వోసీలు క్లియర్ చేయాలని సీఎం రేవంత్ రెడ్డి ఆదేశించినట్టు సీఎంవో తెలిపారు.
