తన వ్యాఖ్యలు, చేష్టలతో నిత్యం వార్తల్లో నిలిచే మునుగోడు ఎమ్మెల్యే కోమటిరెడ్డి రాజగోపాల్ రెడ్డి మరోసారి కీలక కామెంట్స్ చేశారు. తెలంగాణ అసెంబ్లీ సమావేశాల్లో భాగంగా సభకు వచ్చిన ఆయన.. లాబీల్లో మీడియాతో చిట్ చాట్‌గా మాట్లాడారు. ప్రస్తుతం ఉన్న అసెంబ్లీని తరలించాల్సిన అవసరం ఉందని చెప్పారు. రాష్ట్రానికి కొత్త సెక్రటేరియట్ నిర్మించినట్లుగానే.. కొత్త అసెంబ్లీ భవనం కూడా అవసరమని చెప్పారు. ఎన్టీఆర్ గార్డెన్‌లో కొత్త అసెంబ్లీ భవన నిర్మాణం జరిగితే బాగుంటుందని చెప్పారు.
సెక్రటేరియట్, అసెంబ్లీలు పక్క పక్కనే ఉంటాయని.. అప్పుడు వ్యూ చూడటానికి బావుంటుందన్నారు. ఇందుకోసం అవసరమైతే హుస్సేన్ సాగర్ ఎఫ్టీఎల్ పరిధిని కుదించవచ్చునని అన్నారు. కొత్త సచివాలయం, అసెంబ్లీ, అమరవీరుల స్థూపం ఇవన్నీ హుస్సేన్ సాగర్ ఒడ్డున చూడ చక్కగా ఉంటాయని అభిప్రాయపడ్డారు. సెక్రటేరియట్, అసెంబ్లీలు పక్క పక్కన ఉంటే పాలన పరంగా కూడా బాగుంటుందన్నారు. గోదావరి జలాలతో జంట నగరాలలోని కుంటలను, చెరువులను నింపొచ్చునని.. ప్రభుత్వం ఈ అంశంపై పరిశీలన చేయాలన్నారు.
ఇక తన మంత్రి పదవిపైనా కోమటిరెడ్డి రాజగోపాల్ రెడ్డి కీలక కామెంట్స్ చేశారు. తనకు మంత్రి పదవి వచ్చేది రానిది అధిష్ఠానం చేతుల్లో ఉందని చెప్పారు. తాను మంత్రి పదవి ఆశిస్తున్న మాట వాస్తవమేనని చెప్పారు. మంత్రివర్గ విస్తరణ అంశం సీఎం రేవంత్ రెడ్డి, పార్టీ అధిష్టానం నేతలు చూసుకుంటున్నారని అన్నారు. అన్ని అంశాలను పరిగణలోకి తీసుకొని మంత్రి పదవి ఇస్తారని.. ఈ రేసులో తాను ముందున్నట్లు కోమటిరెడ్డి వెల్లడించారు. కాగా, ప్రస్తుతం తెలంగాణ కేబినెట్‌లో ఆరు బెర్తులు ఖాళీగా ఉన్నాయి.
తెలంగాణ మెుత్తం కేబినెట్ మంత్రుల సంఖ్య 18 కాగా, సీఎం రేవంత్‌తో కలిపి ప్రస్తతం 12 మంది మంత్రులుగా ఉన్నారు. మరో ఆరు స్థానాలు గత ఏడాది కాలంగా ఖాళీగానే ఉన్నాయి. కేబినెట్ విస్తరణపై ఎప్పటికప్పుడు వార్తలు వచ్చినా.. అవి కార్యరూపం దాల్చలేదు. ఈనెలాఖరులోగా కేబినెట్ విస్తరణ ఉంటుందని పలువురు మంత్రులు చెప్పినా.. సీఎం రేవంత్ మాత్రం భిన్నంగా స్పందించారు. ప్రస్తుతం అసెంబ్లీ, పార్లమెంట్ సమావేశాలు ఉన్నాయని.. కేబినెట్ విస్తరణపై చర్చించే అవకాశం లేకుండా ఉందని అన్నారు.
