బ్యాటింగ్‌లో సత్తా చాటిన జైశ్వాల్, కోహ్లి
బౌలింగ్‌లో చెలరేగిన బుమ్రా, సిరాజ్‌
డబ్ల్యూటీసీ పాయింట్ల పట్టికలో అగ్రస్థానం
ఆస్ట్రేలియా గడ్డపై భారత్‌ బోణీ కొట్టింది. బోర్డర్‌ గవాస్కర్‌ ట్రోఫీలో భాగంగా పెర్త్‌ వేదికగా జరిగిన తొలి టెస్టులో టీమిండియా 295 పరుగుల భారీ తేడాతో ఆస్ట్రేలియాను చిత్తు చేసింది. ప్రత్యర్థికి ఏమాత్రం అవకాశం ఇవ్వకుండా టీమిండియా పేసర్లు చెలరేగారు. దీంతో 295 పరుగుల తేడాతో ఆతిథ్య జట్టును బుమ్రా సేన మట్టికరిపించింది. భారత పేస్‌ అటాక్‌కు.. సెకండ్‌ ఇన్నింగ్స్‌లో బ్యాటర్ల దూకుడు తోడు కావడంతో టీమిండియా సునాయసంగా గెలిచింది. ఈ విజయంతో బోర్డర్‌ గావస్కర్‌ ట్రోఫీలో 1–0 ఆధిక్యంలోకి వెళ్లింది. పెర్త్‌ స్టేడియంలో ఆస్ట్రేలియా జట్టుకు ఇదే తొలి ఓటమి కావడం
మొదటి ఇన్నింగ్స్‌లో..
ఈ మ్యాచ్‌లో టాస్‌ గెలిచి తొలుత బ్యాటింగ్‌ చేసిన టీమిండియా 150 పరుగులకే ఆలౌట్‌ అయింది. ఆ తర్వాత ఆస్ట్రేలియాను మరింత తక్కువకే పరిమితం చేసింది. కేవలం 104 పరుగులకే కుప్పకూల్చింది. దీంతో తొలి ఇన్నింగ్స్‌లో భారత్‌కు 46 పరుగుల కీలక ఆధిక్యం లభించింది. ఇక రెండో ఇన్నింగ్స్‌లో భారత బ్యాటర్లు గొప్పగా ఆడారు. ముఖ్యంగా యువ ఓపెనర్‌ యశస్వి జైశ్వాల్ (161), సీనియర్‌ బ్యాటర్‌ విరాట్‌ కోహ్లీ (100) సెంచరీలతో చెలరేగారు. కేఎల్‌ రాహుల్‌ (77) కూడా హాఫ్‌ సెంచరీతో రాణించాడు. దీంతో టీమిండియా 487/6 వద్ద రెండో ఇన్నింగ్స్‌ను డిక్లేర్‌ చేసింది.
534 పరుగుల లక్ష్యంతో బరిలోకి దిగిన ఆస్ట్రేలియాకు ఏ దశలోనూ గెలిచేలా కన్పించలేదు. మూడో రోజు సుమారు 30 నిమిషాలు బ్యాటింగ్‌ చేసిన ఆసీస్‌.. మూడు కీలక వికెట్లు కోల్పోయింది. 12/3తో నాలుగో రోజు బ్యాటింగ్‌ ప్రారంభించిన ఆస్ట్రేలియా 238 పరుగులకు ఆలౌట్‌ అయింది. రెండో ఇన్నింగ్స్‌లో స్టీవ్‌ స్మిత్‌ నిరాశపరిచాడు. ట్రావిస్‌ హెడ్‌ 89 పరుగులతో టాప్‌ స్కోరర్‌గా నిలిచాడు. మిచెల్‌ మార్‌‡్ష (47)తో ఫర్వాలేదనిపించాడు. భారత బౌలర్లలో తొలి ఇన్నింగ్స్‌లో 5 వికెట్లు తీసిన బుమ్రా.. రెండో ఇన్నింగ్స్‌లో 3 వికెట్లతో సత్తా చాటాడు. సెకండ్‌ ఇన్నింగ్స్‌లో బౌలింగ్‌ చేసిన ఐదుగురు భారత బౌలర్లకూ వికెట్లు దక్కడం గమనార్హం.
1–0తో ఆధిక్యం..
ఇక ఈ మ్యాచ్‌ విజయంతో 5 మ్యాచ్‌ల టెస్టు సిరీస్‌లో భారత్‌.. 1–0తో ఆధిక్యంలోకి దూసుకెళ్లింది. డిసెంబర్‌ 6 నుంచి ఆడిలైడ్‌ వేదికగా రెండో టెస్టు ప్రారంభం కానుంది. కాగా గత రెండు పర్యాయాలు ఆస్ట్రేలియాలో జరిగిన బోర్డర్‌ గవాస్కర్‌ ట్రోఫీని భారత్‌ 2–1తో కైవసం చేసుకుంది. ఈసారి కూడా అదే లక్ష్యంతో బరిలోకి దిగింది. అనుకున్నట్లుగానే సిరీస్‌లో శుభారంభం చేసింది.
ప్రపంచ టెస్టు ఛాంపియన్‌ షిప్‌ ఫైనల్‌కు ముందు టీమిండియాకు ఇదే చివరి టెస్టు సిరీస్‌. ఇందులో 4–0తో భారత్‌ గెలిస్తే.. ఇతర జట్ల ఫలితాలతో సంబంధం లేకుండా వరుసగా మూడోసారి భారత ఫైనల్‌ చేరుతుంది. పెర్త్‌ టెస్టులో విజయంతో డబ్ల్యూటీసీ పాయింట్ల పట్టికలో భారత్‌ తిరిగి అగ్రస్థానానికి చేరుకుంది.
