కాంగ్రెస్ అగ్రనేత సోనియా గాంధీ పుట్టినరోజును పురస్కరించుకుని.. సచివాలయంలో తెలంగాణ తల్లి విగ్రహాన్ని రేవంత్ రెడ్డి సర్కార్ ఆవిష్కరించిన విషయం తెలిసిందే. ఇన్ని రోజులుగా ఉన్న తెలంగాణ తల్లి రూపాన్ని కాదని.. రేవంత్ రెడ్డి సర్కార్ ప్రత్యేకంగా మరో విగ్రహాన్ని తయారు చేపించి ఆవిష్కరిస్తుండటం ఇప్పుడు సర్వత్రా చర్చనీయాంశంగా మారింది. ఇన్ని రోజులు ఉన్న విగ్రహం ఒక పార్టీకి మాత్రమే పరిమితమైందని.. ప్రస్తుతం ఆవిష్కరిస్తున్న విగ్రహం తెలంగాణలోని ప్రతి ఇంట్లోని ఓ తల్లిని తలపించేలా ఉందని కాంగ్రెస్ ప్రభుత్వం చెప్తుంటే.. కొత్త విగ్రహం తెలంగాణ తల్లి కాదని.. కాంగ్రెస్ తల్లి విగ్రహమంటూ బీఆర్ఎస్ పార్టీ నేతలు విమర్శిస్తున్నారు.
ఈ క్రమంలోనే.. అసలు తెలంగాణ తల్లికి మొట్టమొదటగా ఎప్పుడు విగ్రహం పెట్టారు.. ఎక్కడ ఏర్పాటు చేశారు.. తొలి తెలంగాణ తల్లి విగ్రహం ఎలా ఉంది.. అసలు ఎవరు ఆవిష్కరించారన్న ఆసక్తికర చర్చ ఇప్పుడు తెరపైకి వచ్చింది. ప్రత్యేక తెలంగాణ రాష్ట్ర సాధన కోసం జోరుగా ఉద్యమం సాగుతున్న రోజులవి. 2007లో మొట్టమొదటి తెలంగాణ తల్లి విగ్రహాన్ని ఏర్పాటు చేశారు. ప్రస్తుత యాదాద్రి భువనగిరి జిల్లాలోని రాజపేట మండలం బేగంపేటలో తొలి తెలంగాణ తల్లి విగ్రహాన్ని ఏర్పాటు చేశారు. తెలంగాణ ఉద్యమ కారుడు సుదగాని వెంకటేష్ ఆధ్వర్యంలో.. 2007 జనవరి 25న అప్పటి.. తల్లి తెలంగాణ పార్టీ అధ్యక్షురాలు విజయశాంతి.. తొలి తెలంగాణ తల్లి విగ్రహాన్ని ఆవిష్కరించారు. విగ్రహావిష్కరణ సమయంలో బేగంపేటలో భారీ బహిరంగ సభ కూడా నిర్వహించారు. అంటే.. సుమారు 17 ఏళ్ల క్రితమే తెలంగాణ తల్లి విగ్రహాన్ని ఏర్పాటు చేయటం గమనార్హం.
