రేవంత్ రెడ్డి సర్కార్ ఏర్పడి ఏడాది పూర్తవుతున్న వేళ.. రాష్ట్ర వ్యాప్తంగా ప్రజాపాలన విజయోత్సవాలు ఘనంగా జరుగుతున్నాయి. ఈ నేపథ్యంలోనే.. మంత్రి సీతక్కకు సీఎం రేవంత్ రెడ్డి అదిరిపోయే గిఫ్ట్ ఇచ్చారు. పంచాయతీరాజ్ గ్రామీణాభివృద్ధి, మహిళా శిశు సంక్షేమ శాఖ మంత్రి సీతక్క ప్రాతినిథ్యం వహిస్తున్న ములుగు నియోజకవర్గంలో కొత్తగా మరో మండలాన్ని ఏర్పాటు చేస్తూ.. రేవంత్ రెడ్డి ప్రభుత్వం ఉత్తర్వులు జారీ చేసింది. ములుగు నియోజకవర్గంలో మల్లంపల్లి ప్రాంత ప్రజల నుంచి 10 ఏళ్లుగా వస్తున్న డిమాండ్‌ను పరిగణలోకి తీసుకున్న రేవంత్ రెడ్డి సర్కార్.. ఎన్నికల్లో ఇచ్చిన మాటను నెరవేర్చుకుంటూ మల్లంపల్లిని మండలంగా ప్రకటించింది. ఈ మేరకు.. మల్లంపల్లిని మండలంగా ఏర్పాటు చేస్తూ రెవెన్యూ శాఖ ఉత్తర్వులు కూడా జారీ చేసింది.
దీంతో.. మల్లంపల్లి ప్రాంత ప్రజల ఆంకాంక్ష నెరవేరినట్టయింది. మరోవైపు.. పంచాయతీరాజ్ గ్రామీణాభివృద్ధి శాఖ మంత్రిగా బాధ్యతలు స్వీకరించిన ఏడాదిలోపే మల్లంపల్లిని మండలంగా ఏర్పాటు చేసి.. ఎన్నికల్లో ఇచ్చిన మాటను సీతక్క నిలబెట్టుకున్నారు. అటు.. పదేళ్ల ఆకాంక్ష నెరవేరటంతో మల్లంపల్లి ప్రాంత ప్రజలు హర్షం వ్యక్తం చేస్తున్నారు. తమ ఆకాంక్షను నెరవేర్చినందుకు మంత్రి సీతక్కకు కృతజ్ఞతలు చెప్తున్నారు.
మరోవైపు.. మల్లంపల్లిని మండలంగా ఏర్పాటు చేసిన సీఎం రేవంత్ రెడ్డితో పాటు ఉమ్మడి వరంగల్ జిల్లా ఇంఛార్జ్, రెవెన్యూ మంత్రి పొంగులేటి శ్రీనివాస్ రెడ్డికి మంత్రి సీతక్క ధన్యవాదాలు తెలిపారు. ఈ సందర్భంగా ట్విట్టర్ వేదికగా పోస్టు పెట్టిన మంత్రి సీతక్క.. మల్లంపల్లి ప్రత్యేక మండలం కోసం ఆ ప్రాంత ప్రజలు పదేళ్లుగా ఎన్నో పోరాటాలు చేశారని గుర్తు చేశారు. ఎన్నికల ముందు రేవంత్ రెడ్డి పాదయాత్ర చేసిన సమయంలో.. మల్లంపల్లి మండలాన్ని ఏర్పాటు చేస్తామని మాటిచ్చారని.. అప్పుడు ఇచ్చిన మాటను సీఎం రేవంత్ రెడ్డి నిలబెట్టుకున్నారని తెలిపారు. ఈ సందర్భంగా.. సీఎం రేవంత్ రెడ్డికి ప్రత్యేక ధన్యవాదాలు తెలిపారు మంత్రి సీతక్క.
