పూర్ణ కుంభంతో ఆలయ అధికారుల స్వాగతం
దక్షిణ కాశిగా పేరుగాంచిన వేములవాడ రాజరాజేశ్వర స్వామిని ముఖ్యమంత్రి రేవంత్ రెడ్డి దర్శించుకున్నారు. బుధవారం రాజన్న సిరిసిల్ల జిల్లా వేములవాడలో 127.65 కోట్ల రూపాయలతో చేపట్టనున్న అభివృద్ధి కార్యక్రమాలను ప్రారంభించేందుకు వచ్చిన సీఎం కు జిల్లా కలెక్టర్‌ సందీప్‌ కుమార్ జా, ఎస్పీ అఖిల్‌ మహాజన్, విప్‌ ఆది శ్రీనివాస్, దేవాదాయ శాఖ కమిషనర్‌ శైలజ రామయ్యర్‌ లు పుష్పగుచ్ఛాలు అందించి స్వాగతం పలికారు. అనంతరం సీఎం పోలీస్‌ గౌరవ వందనం స్వీకరించారు.
రాజరాజేశ్వరి మాతను దర్శించుకున్న సీఎం..
తర్వాత రాజన్న ఆలయానికి చేరుకున్నారు. ఆలయ అర్చకులు సీఎంకు పూర్ణకుంభంతో స్వాగతం పలికారు. సీఎం.. ధ్వజస్తంభాన్ని దర్శించుకుని కోడే మొక్కలు చెల్లించారు. లక్ష్మి గణపతి ని దర్శించుకున్న అనంతరం రాజరాజేశ్వర స్వామిని దర్శించుకుని అభిషేకం నిర్వహించి మొక్కులు చెల్లించారు. అనంతరం రాజరాజేశ్వరి అమ్మవారిని దర్శించుకున్నారు. ఆశీర్వాద మండపంలో ఆలయ అర్చకులు, దేవాదాయ శాఖ అధికారులు, స్థానిక ఎమ్మెల్యే ఆది శ్రీనివాస ముఖ్యమంత్రి రేవంత్ రెడ్డికి స్వామి వారి చిత్రపటాన్ని అందించి తీర్థ ప్రసాదాలు అందజేశారు.
ఈ కార్యక్రమంలో ప్రభుత్వ ప్రధాన కార్యదర్శి శాంతి కుమారి, మంత్రులు దుద్దిల్ల శ్రీధర్‌ బాబు, పొన్నం ప్రభాకర్, కొండా సురేఖ, తుమ్మల నాగేశ్వరరావు, ఉత్తంకుమార్‌ రెడ్డి, పొంగులేటి శ్రీనివాస్ రెడ్డి, ప్రభుత్వ విప్‌ ఆది శ్రీనివాస్, పీసీసీ చీఫ్‌ మహేష్‌ కుమార్, ఉన్నతాధికారులు, ఎమ్మెల్యేలు పాల్గొన్నారు. ముఖ్యమంత్రి పర్యటన సందర్భంగా ఎలాంటి అవాంఛనీయ సంఘటన చోటుచేసుకోకుండా పటిష్టమైన పోలీసు బందోబస్తు ఏర్పాటు చేశారు.
