– హాజరుకానున్న సీఎం, మంత్రులు, ఎమ్మెల్సీలు, ఎమ్మెల్యేలు
– తాజా రాజకీయ పరిణామాలపై చర్చించే అవకాశం
– రాజ్యసభ స్థానానికి వచ్చే నెల 3న ఉప ఎన్నిక
(అమ్మన్యూస్, హైదరాబాద్‌):
రాజ్యసభ కాంగ్రెస్‌ అభ్యర్థిగా అభిషేక్‌ సింఘ్వీ సోమవారం నామినేషన్‌ వేయనున్నారు. ఈ మేరకు ఆదివారం రాత్రి 7 గంటల ప్రాంతంలో పార్టీ శాసనసభా పక్ష సమావేశం జరగనుంది. నానక్‌ రామ్‌గూడలోని హోటల్‌ షెరటాన్‌ లో సమావేశం జరుగుతుంది. తెలంగాణ కోటాలోని రాజ్యసభ స్థానానికి సీనియర్‌ నేత కేకే రాజీనామా చేయడంతో వచ్చే నెల 3న ఉప ఎన్నిక జరగనున్న విషయం తెలిసిందే.
అందిన ఆహ్వానాలు..
సీఎల్పీ సమావేశానికి ఎమ్మెల్యేలతోపాటు ఎమ్మెల్సీలు, ఎంపీలకు ఆహ్వానం అందించారు. ఈ సమావేశంలో రాజ్యసభ అభ్యర్థి అభిషేక్‌ సింఘ్వీ పరిచయ కార్యక్రమంతోపాటు, తాజా రాజకీయ పరిణామాలపై చర్చించనున్నారు. ఈ సమావేశంలో పాల్గొనేందుకు కాంగ్రెస్‌ రాజ్యసభ అభ్యర్థి అభిషేక్‌ సింఘ్వీ మధ్యాహ్నం హైదరాబాద్‌ చేరుకుంటారు. సీఎల్పీ సమావేశంలో తన రాజ్యసభ అభ్యర్థిత్వానికి మద్దతు ఇవ్వాలని పార్టీ ఎమ్మెల్యేలను మర్యాద పూర్వకంగా సింఘ్వీ కోరనున్నారు. రేపు అసెంబ్లీలో 11గంటలకు సింఘ్వీ నామినేషన్‌ దాఖలు చేస్తారు. ఈ నామినేషన్‌ కార్యక్రమంలో సీఎం రేవంత్ రెడ్డితోపాటు మంత్రులు, ఎమ్మెల్యేలు, ఎమ్మెల్సీలు పాల్గొననున్నారు.
కేకే రాజీనామాతో..
తెలంగాణ కోటాలోని రాజ్యసభ స్థానానికి సీనియర్‌ నేత కేకే రాజీనామా చేయడంతో వచ్చే నెల 3న ఉప ఎన్నిక జరగనుంది. దీనికి కాంగ్రెస్‌ పార్టీ తరపున ఆ పార్టీ జాతీయ అధికార ప్రతినిధి అభిషేక్‌ మనుసింఘ్వీ అభ్యర్థిత్వాన్ని ఇటీవల హైకమాండ్‌ ఖరారు చేసింది. దీంతో ఈ స్థానంలో సింఘ్వీని గెలిపించుకోవడమే ప్రధాన ఎజెండగా సీఎల్పీ సమావేశం సాగనుంది. దీనికితోడు రాష్ట్రంలో తాజా రాజకీయ పరిస్థితులు, రైతు రుణమాఫీ, తదితర విషయాలపై ఈ సమావేశంలో నేతలు చర్చించనున్నారు.
ఇటీవలే రేవంత్‌ను కలిసిన సింఘ్వీ..
ఇప్పటికే సీఎం రేవంత్ రెడ్డి ఢిల్లీ వెళ్లిన సమయంలో కాంగ్రెస్‌ రాజ్యసభ అభ్యర్థి అభిషేక్‌ మనుసింఘ్వీ భేటీ అయ్యారు. ఢిల్లీలోని సీఎం అధికారిక నివాసానికి వచ్చి రేవంత్ రెడ్డిని సింఘ్వీ మరద్య పూర్వకంగా కలిశారు. తెలంగాణ నుంచి రాజ్యసభ అభ్యర్థిగా అవకాశం కల్పించినందుకు రేవంత్ కు కృతజ్ఞతలు తెలిపారు.
