మధ్యప్రదేశ్ లోని కునో నేషనల్ పార్క్ నుంచి తప్పించుకున్న ఒబాన్ అనే మగ నమీబియా చిరుతను అధికారులు విజయవంతంగా తీసుకువచ్చారు. గత ఐదు రోజుల క్రితం అంటే ఏప్రిల్ 2న జాతీయ ఉద్యానవనం నుంచి తప్పించుకోవడంతో అటవీ అధికారులు వేట సాగించారు. ఆ తర్వాత తమ గ్రామంలో చిరుత సంచ‌రిస్తోందని గుర్తించిన కొందరు గ్రామస్థులు కొందరు వీడియోలు తీసి సోష‌ల్ మీడియాలో పోస్టు చేశారు. ఆ తర్వాత అటవీ అధికారుల‌కు సమాచారం అందించారు. చివరకు చిరుత రాంపురాలో ఉన్నట్టుగా గుర్తించిన అధికారులు… చిరుత‌కు ట్రాన్కిలైజ‌ర్ ఇచ్చి, తిరిగి కునో నేషనల్ పార్కుకు తిరిగి తీసుకువచ్చారు.
నమీబియా చిరుత ఒబాన్ ఏప్రిల్ 2 నుంచి త‌ప్పించుకుని.. చుట్టు ప్రాంతాల్లో సంచ‌రించింది. కునో నేషనల్ పార్కుకు 20 కిలోమీట‌ర్ల దూరంలో ఉన్న విజ‌య్ పూర్ ప్రాంతం క‌నిపించిందని గ్రామస్థులు వెల్లడించారు. ఆ తర్వాత ప‌ర్వాటీ బ‌రోడా గ్రామంలో ఓ న‌దిలో నీరు త్రాగుతూ క‌నిపించిందంటూ సమాచారం వచ్చింది. చిరుత క‌ద‌లిక‌ల‌ను నిశితంగా ప‌రిశీలించిన అధికారులు.. ఎట్టకేలకు ఎంతో నేర్పుతో దాన్ని ప‌ట్టుకున్నారు. నమీబియా నుంచి రెండు విడ‌త‌లుగా 20 చిరుత‌లు భార‌త‌దేశానికి వ‌చ్చాయి. గ‌తేడాది సెప్టెంబ‌ర్ నెల‌లో 8 చిరుత‌ల‌ను తీసుకురాగా.. ఈ ఏడాది ఫిబ్రవ‌రిలో మ‌రో 12 చిరుత‌ల‌ను తీసుకువచ్చారు.
