మేం అధికారంలోకి రాగానే సమస్యలు పరిష్కరిస్తాం..
సింగరేణి కార్మికుల త్యాగాలను ముఖ్యమంత్రి కేసీఆర్ మరిచిపోయారని టీపీసీసీ రేవంత్ రెడ్డి ఫైరయ్యారు. తెలంగాణ సాధనలో సింగరేణి కార్మికులు ప్రత్యక్ష భాగస్వాములని.. జెండాలను ఎజెండాలను పక్కనబెట్టి అంతా ఏకమైతే తెలంగాణ సాకారమైందన్నారు. భూపాలపల్లిలో సింగరేణి కార్మికులతో ఇవాళ సమావేశమైన రేవంత్.. కార్మికుల త్యాగాన్ని బీఆర్ఎస్ ప్రభుత్వం మరిచిపోయిందన్నారు.
‘సకలజనుల సమ్మెలో మీరు భాగస్వాములు కాకపోతే.. తెలంగాణ సాకరమయ్యేదా ? కార్మికుల వైపు ఉన్నామనేది వాళ్లే.., ప్రభుత్వంలో ఉన్నది వాళ్లే.., సమస్యలు పరిష్కరించకుండా జాప్యం చేస్తున్నది వాళ్లే.. ఒకే ఒక్క అధికారిని సింగరేణికి పెట్టి దివాళా తీయించారు. వారి తప్పులను కప్పిపుచ్చుకుంటున్నారు. సింగరేణిని ప్రయివేటు పరం చేయటానికి బీఆర్ఎస్ ఒప్పుకుంది నిజం కాదా ? అరబిందోకు మైన్ అప్పగించింది నిజం కాదా ? తాడిచర్ల మైన్ను నీ అనుయాయులకు అప్పగించింది నిజం కాదా ? నైని కోల్ మైన్ను అదానీకి కట్టబెట్టాలని చూసింది నిజం కాదా ? మైన్ను ప్రయివేట్ పరం చేయటాన్ని అడ్డుకున్నది మేం కాదా ?’ అని రేవంత్ రెడ్డి ప్రశ్నించారు.
సింగరేణి ఎన్నికలను జరపకుండా కేసీఆర్ ఎందుకు తప్పించుకుంటున్నారని రేవంత్ నిలదీశారు. జెన్ కో బిల్లులు కట్టి ఉంటే.. ఓపెన్ కాస్ట్ మైన్‌లు ప్రయివేటు పరం చేయకుండా ఉంటే ఎన్నికలు జరిపేవారు కాదా అని ప్రశ్నించారు. డిసెంబర్ 27న సింగరేణి ఎన్నికలు జరగాలంటే.. డిసెంబట్ 3న కాంగ్రెస్ అధికారంలోకి రావాలన్నారు. తెలంగాణ సాధించిన కార్మికులుగా మిమ్మల్ని గుర్తించాల్సిన బాధ్యత ప్రభుత్వాలకు ఉందని చెప్పారు. కాంగ్రెస్ అధికారంలోకి వస్తే కార్మికుల సమస్యలు యుద్ధ ప్రాతిపదికన పరిష్కరిస్తుందని అన్నారు.
‘సింగరేణి దివాళా తీయడానికి జెన్ కో బకాయి పడ్డ వేలాది కోట్లే కారణం. ఉచిత విద్యుత్‌తో జెన్ కో, ట్రాన్స్ కోకు ప్రభుత్వం ఇవ్వాల్సిన బిల్లులు చెల్లించడం లేదు. జెన్ కో సింగరేణి బొగ్గుకు ఇవ్వాల్సిన బకాయి చెల్లించడం లేదు. జెన్ కోకు 8 ఏళ్లుగా సీఎండీగా ఒక్కరే ఉన్నారు. ఐఏఎస్‌ల్లో సమర్థులు లేరా? ఎందులో అయినా కేసిఆర్ దోస్తులు కుటుంబసభ్యులు ఉంటారు. సింగరేణిని ప్రైవేట్ పరం మోదీ చేస్తున్నాడని కేసిఆర్ అంటున్నారు. సింగరేణి ప్రైవేట్ పరం చేసే బిల్లు 2015లోనే వచ్చింది. అప్పుడు పార్లమెంటులో బిల్లు పెట్టినప్పుడు ఎంపీగా ఉన్న కవిత మద్దతు తెలిపారు. ఎంపీగా ఓడిన కవిత సింగరేణి కార్మిక సంఘం గౌరవ అధ్యక్షురాలుగా ఉన్నారు. వినోద్ కుమార్ ప్రణాళిక సంఘం ఉపాధ్యక్షుడు అయ్యాడు.’ అని రేవంత్ అన్నారు.
