ఆంధ్రప్రదేశ్ ముఖ్యమంత్రి చంద్రబాబు నాయుడు రాష్ట్రంలోని వైద్య విద్యను పూర్తిగా ప్రైవేటు రంగానికి అప్పగించేందుకు ప్రయత్నిస్తున్నారని వైఎస్సార్ కాంగ్రెస్ పార్టీ సీనియర్ నాయకుడు బొత్స సత్యనారాయణ తీవ్రంగా మండిపడ్డారు. ముఖ్యమంత్రి నిర్ణయం ప్రజా ప్రయోజనాల్ని పక్కనబెట్టి, కార్పొరేట్ ఆసక్తులను ముందుకు తెచ్చే విధంగా ఉందని ఆయన విమర్శించారు. “ప్రపంచంలో ఎక్కడా ప్రభుత్వ వైద్య విద్యను ఇలా పూర్తిగా ప్రైవేటీకరించరు… ఇది ప్రజావ్యతిరేక నిర్ణయం,” అని బొత్స వ్యాఖ్యానించారు.
ప్రభుత్వ నిర్ణయాన్ని నిరసిస్తూ వైఎస్సార్సీపీ రాష్ట్రంలోని 26 జిల్లాల్లో కోటి సంతకాల సేకరణ కార్యక్రమం చేపట్టినట్లు బొత్స తెలిపారు. త్వరలోనే వైఎస్ జగన్ మోహన్ రెడ్డి నేతృత్వంలోని బృందంతో కలిసి గవర్నర్ను కలిసి ఈ వ్యవహారంపై అధికారిక ఫిర్యాదు చేయనున్నట్లు వెల్లడించారు. అంతేకాకుండా, పేదలకు ఏర్పాటు చేసిన ప్రభుత్వ మెడికల్ కాలేజీలకు నిధులు ఇవ్వకపోవడంతో ఎంసీఐ (మెడికల్ కౌన్సిల్ ఆఫ్ ఇండియా) అనుమతులు కూడా ప్రమాదంలో పడుతున్నాయని ఆయన హెచ్చరించారు. రాష్ట్రంపై పేరుకుపోయిన రూ. 2.60 లక్షల కోట్ల అప్పు విషయంలో శ్వేతపత్రం విడుదల చేసి, నిధుల వినియోగంపై ప్రభుత్వం స్పష్టత ఇవ్వాలని బొత్స డిమాండ్ చేశారు.
గుర్ల మండలంలో ప్రతిపాదించిన స్టీల్ ప్లాంట్పై కూడా బొత్స స్పందించారు. స్థానిక రైతుల అభిప్రాయానికే తమ పార్టీ పూర్తి ప్రాధాన్యత ఇస్తుందని, రైతులు పెద్ద సంఖ్యలో వ్యతిరేకిస్తే, వారి పక్షాన పోరాటం కొనసాగిస్తామని స్పష్టం చేశారు. ప్రజల హక్కులు, భూములు, జీవనాధారాన్ని కాపాడేందుకు వైఎస్సార్ కాంగ్రెస్ పార్టీ కట్టుబడి ఉంటుందని ఆయన పునరుద్ఘాటించారు.
