శంషాబాద్లోని రాజీవ్ గాంధీ అంతర్జాతీయ విమానాశ్రయంలో (RGIA) ఇండిగో ఎయిర్లైన్స్ ఎదుర్కొంటున్న సమస్యలు తీవ్రమవుతున్నాయి. వరుసగా ఏడో రోజు సోమవారం కూడా సంస్థ ఏకంగా 112 విమాన సర్వీసులను రద్దు చేయడంతో ప్రయాణికులు తీవ్ర ఇబ్బందులు పడ్డారు. గత వారం రోజుల్లోనే మొత్తం 600కు పైగా విమాన సర్వీసులు రద్దు కావడంతో పరిస్థితి మరింత క్లిష్టంగా మారింది. ముఖ్యంగా డిసెంబర్ 5న ఒక్కరోజే 155 విమానాలు రద్దు కావడం గమనార్హం. ఈ ఆకస్మిక రద్దుల కారణంగా వందలాది మంది ప్రయాణికులు ఎయిర్పోర్ట్లో చిక్కుకుపోవాల్సి వచ్చింది.
వరుసగా జరుగుతున్న విమాన రద్దులకు ప్రధాన కారణంగా ఇండిగో యాజమాన్యం కొత్త FDTL (Flight Duty Time Limit) నిబంధనలను పేర్కొంది. పైలట్ల విశ్రాంతి సమయాన్ని పెంచేందుకు డైరెక్టరేట్ జనరల్ ఆఫ్ సివిల్ ఏవియేషన్ (DGCA) ఈ కొత్త నిబంధనలను ప్రవేశపెట్టింది. ఈ మార్పుల కారణంగానే విమానాల షెడ్యూలింగ్లో సమస్యలు ఏర్పడి, ఢిల్లీ, బెంగళూరు, కోల్కతా, చెన్నై, విశాఖ, గోవా వంటి కీలక రూట్లలో సర్వీసులు నిలిచిపోయాయి.
ప్రయాణికులు ఎదుర్కొంటున్న తీవ్ర అసౌకర్యాన్ని దృష్టిలో ఉంచుకుని, ఇండిగో సంస్థ డిసెంబర్ 15 వరకు బుకింగ్లపై రద్దు మరియు రీషెడ్యూలింగ్ ఛార్జీలను మినహాయించింది. ఇదే సమయంలో, రద్దుల సంఖ్య పెరగడం, ప్రయాణికుల నుంచి తీవ్ర వ్యతిరేకత రావడంతో, విమానయాన సంస్థ అభ్యర్థన మేరకు DGCA తాత్కాలికంగా ఫిబ్రవరి 10 వరకు FDTL నిబంధనల్లో సడలింపు ఇచ్చింది. విమానాశ్రయంలో నెలకొన్న ఉద్రిక్త పరిస్థితుల నేపథ్యంలో ప్రయాణికులు సిబ్బందిని ప్రశ్నించడంతో భద్రత కోసం సీఐఎస్ఎఫ్ (CISF) అదనపు బలగాలను కూడా మోహరించారు.
