రంగారెడ్డి జిల్లా, కందుకూరు మండలం, ఫ్యూచర్ సిటీలో ప్రతిష్టాత్మకంగా ప్రారంభమైన “తెలంగాణ రైజింగ్ గ్లోబల్ సమ్మిట్-2025” తొలి రోజు అట్టహాసంగా జరిగింది. ఈ సదస్సును గవర్నర్ జిష్ణుదేవ్ వర్మ ప్రారంభించారు. ప్రారంభోత్సవానికి ముఖ్యమంత్రి రేవంత్ రెడ్డి, కేంద్రమంత్రి కిషన్ రెడ్డి, ఉప ముఖ్యమంత్రి మల్లు భట్టివిక్రమార్క, సినీ నటుడు నాగార్జున సహా దేశీయ, అంతర్జాతీయ పారిశ్రామికవేత్తలు హాజరయ్యారు. ఈ సదస్సులో ప్రత్యేకంగా, ప్రముఖులను ‘రోబో’ (Robot) ద్వారా ఆహ్వానించడం హాజరైన అందరినీ విశేషంగా ఆకట్టుకుంది.
44 దేశాల నుండి 154 మంది ప్రతినిధులు పాల్గొంటున్న ఈ రెండు రోజుల సదస్సు 100 ఎకరాల విస్తీర్ణంలో ఏర్పాటు చేయబడింది. ప్రారంభానికి ముందు ముఖ్యమంత్రి రేవంత్ రెడ్డి సదస్సు ప్రాంగణంలోని స్టాళ్లను పరిశీలించారు. ఈ సందర్భంగా సీఎం రేవంత్ రెడ్డి తెలంగాణ తల్లి డిజిటల్ విగ్రహాన్ని ఆవిష్కరించారు. సదస్సులో ప్రధానంగా తెలంగాణలో ఉన్న పెట్టుబడుల అవకాశాలు, ‘ప్రజా పాలన’, ప్రభుత్వం అందించే సహకారం, అలాగే “విజన్ 2047” డాక్యుమెంట్ లక్ష్యాలు, మరియు ‘భారత్ ఫ్యూచర్ సిటీ’ ప్రాజెక్ట్ వంటి అంశాలపై ముఖ్యమంత్రి వివరించనున్నారు.
ఈ గ్లోబల్ సమ్మిట్ ద్వారా తెలంగాణ రాష్ట్రం తన దార్శనికతను ప్రపంచానికి చాటిచెప్పాలని లక్ష్యంగా పెట్టుకుంది. దీని ద్వారా 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా మార్చే ప్రణాళికలను ఆవిష్కరించనున్నారు. ఈ సమ్మిట్కు వివిధ దేశాల ప్రతినిధులతో పాటు నోబెల్ విజేత కైలాష్ సత్యార్థి, ట్రంప్ మీడియా టెక్నాలజీస్ సంస్థ డైరెక్టర్ ఎరిక్ వంటి దిగ్గజాలు హాజరయ్యారు. ట్రంప్ మీడియా టెక్నాలజీస్ సంస్థ వచ్చే పదేళ్లలో రాష్ట్రంలో రూ. లక్ష కోట్లు పెట్టుబడులు పెట్టనున్నట్లు తొలిరోజే ప్రకటించడం సమ్మిట్లో ముఖ్య అంశంగా నిలిచింది.
