హైదరాబాద్ నగరంలోని రాయదుర్గం, మాదాపూర్, గంచిబౌలి వంటి ప్రధాన ఐటీ కేంద్రాల్లో వెలుస్తున్న విలాసవంతమైన కో-లివింగ్ వసతి గృహాలు ఇప్పుడు మాదకద్రవ్యాల అడ్డాగా మారుతున్నాయి. తాజాగా రాయదుర్గం అంజయ్య నగర్లోని ‘కో లివ్ గెర్నట్ పీజీ హాస్టల్’లో డ్రగ్స్ విక్రయాలు జరుగుతున్నాయన్న సమాచారంతో స్పెషల్ ఆపరేషన్ టీమ్ (SOT) పోలీసులు ఆకస్మిక దాడులు నిర్వహించారు. ఈ దాడుల్లో ఆంధ్రప్రదేశ్కు చెందిన ఇద్దరు డ్రగ్ పెడ్లర్లతో పాటు, మత్తు పదార్థాలు వినియోగిస్తున్న ముగ్గురు సాఫ్ట్వేర్ ఉద్యోగులను పోలీసులు అదుపులోకి తీసుకున్నారు. వారి వద్ద నుంచి 12 గ్రాముల MDMA, 7 గ్రాముల గంజాయి మరియు ఆరు సెల్ ఫోన్లను స్వాధీనం చేసుకున్నారు.
సరఫరాదారులు తెలివిగా భారీ జీతాలు తీసుకునే సాఫ్ట్వేర్ ఉద్యోగులను లక్ష్యంగా చేసుకుని ఈ దందాను సాగిస్తున్నారు. ఐటీ రంగంలో పనిచేసే యువతకు ఆర్థిక స్తోమత ఎక్కువగా ఉండటంతో, ఖరీదైన డ్రగ్స్ కొనుగోలు చేయడానికి వారు వెనకాడటం లేదని పోలీసుల విచారణలో తేలింది. పని ఒత్తిడి నుంచి ఉపశమనం కోసం లేదా విలాసం కోసం కో-లివింగ్ హాస్టల్స్లో లభించే స్వేచ్ఛను ఆసరాగా చేసుకుని యువత ఈ మత్తు ఊబిలో కూరుకుపోతున్నారు. ఈ బలహీనతనే పెడ్లర్లు తమ పెట్టుబడిగా మార్చుకుని హాస్టళ్లలోనే రహస్యంగా విక్రయాలు జరుపుతున్నారు.
ఈ పెరుగుతున్న మత్తు సంస్కృతిని అరికట్టడానికి తెలంగాణ ప్రభుత్వం మరియు యాంటీ నార్కోటిక్స్ బ్యూరో (TGANB) అత్యంత కఠినంగా వ్యవహరిస్తున్నాయి. ఐటీ కారిడార్లోని హాస్టళ్లపై నిరంతర నిఘా ఉంచడమే కాకుండా, డ్రగ్స్ కేసుల్లో పట్టుబడితే ఉద్యోగాలు పోవడమే కాకుండా విదేశాలకు వెళ్లేందుకు అవసరమైన పాస్పోర్ట్ క్లియరెన్స్ కూడా దక్కదని పోలీసులు హెచ్చరిస్తున్నారు. వసతి గృహాల్లో ఇలాంటి అసాంఘిక కార్యకలాపాలు సాగితే కేవలం నిందితులనే కాకుండా, హాస్టల్ యజమానులపై కూడా కేసులు నమోదు చేస్తామని స్పష్టం చేశారు. ఐటీ కంపెనీల యాజమాన్యాలతో చర్చలు జరిపి ఉద్యోగుల్లో అవగాహన కల్పించేందుకు ప్రభుత్వం ప్రయత్నిస్తోంది.
