పశ్చిమ గోదావరి జిల్లా పెరవలిలో శనివారం జరిగిన ‘అమరజీవి జలధార’ పథకం శంకుస్థాపన సభలో ఉప ముఖ్యమంత్రి పవన్ కల్యాణ్ అత్యంత దూకుడుగా ప్రసంగించారు. తనపై మరియు జనసేన పార్టీపై వస్తున్న విమర్శలకు ఆయన గట్టి కౌంటర్ ఇచ్చారు. గత ఎన్నికల సమయంలో తాను సీట్లను అమ్ముకున్నానంటూ వస్తున్న ఆరోపణలపై స్పందిస్తూ.. రాష్ట్ర ప్రయోజనాలు మరియు ఓట్ల చీలికను నివారించాలనే ఉద్దేశంతోనే ప్రజల తీర్పును గౌరవించి సీట్లను తగ్గించుకున్నానని, అమ్ముకోవాల్సిన అవసరం తనకు లేదని స్పష్టం చేశారు.
సోషల్ మీడియాలో తనను మరియు ప్రభుత్వాన్ని లక్ష్యంగా చేసుకుని విమర్శలు చేస్తున్న వారిపై పవన్ తీవ్రస్థాయిలో విరుచుకుపడ్డారు. “అధికారం ఉన్నా లేకపోయినా నా వైఖరి మారదు, బెదిరించే నాయకులకు నేను భయపడను” అని తేల్చి చెప్పారు. ఉత్తరప్రదేశ్ ముఖ్యమంత్రి యోగి ఆదిత్యనాథ్ శైలిని ప్రస్తావిస్తూ.. మర్యాదగా చెబితే వినని వారికి తనదైన శైలిలో సమాధానం చెబుతానని హెచ్చరించారు. “నిబంధనలు అతిక్రమించి నోరు పారేసుకునే వారిని కాలుకు కాలు, కీలుకు కీలు పెట్టి కింద కూర్చోబెడతా” అంటూ పవన్ చేసిన వ్యాఖ్యలు రాజకీయ వర్గాల్లో ప్రకంపనలు సృష్టిస్తున్నాయి.
కులాల చుట్టూ రాజకీయాలు చేసే వారిపై కూడా పవన్ ఆగ్రహం వ్యక్తం చేశారు. కేవలం ఒక కులం కోసం తాను రాజకీయాల్లోకి రాలేదని, అన్ని వర్గాల అభివృద్ధి తన లక్ష్యమని పునరుద్ఘాటించారు. శాంతిభద్రతల విషయంలో రాజీ పడే ప్రసక్తే లేదని, మహిళలపై దాడులు చేసినా లేదా అసభ్యకరంగా ప్రవర్తించినా కఠిన చర్యలు తప్పవని హెచ్చరించారు. పవన్ కల్యాణ్ చేసిన ఈ ‘మాస్’ ప్రసంగం సోషల్ మీడియాలో వైరల్ అవుతుండగా, కూటమి ప్రభుత్వ పటిష్టతపై ఆయన మరోసారి క్లారిటీ ఇచ్చారు.
