తెలంగాణ మహిళా, శిశు సంక్షేమ శాఖ మంత్రి సీతక్క (ధనసరి అనసూయ) గురువారం నాంపల్లిలోని ప్రజాప్రతినిధుల కోర్టుకు హాజరయ్యారు. గత బీఆర్ఎస్ ప్రభుత్వ హయాంలో ఆమెపై నమోదైన ఒక పాత కేసు విచారణలో భాగంగా మంత్రి కోర్టుకు వచ్చారు. ఆమెతో పాటు ఈ కేసులో నిందితుడిగా ఉన్న ఎమ్మెల్సీ బల్మూరి వెంకట్ కూడా న్యాయస్థానం ముందు హాజరయ్యారు. ఉదయం నాంపల్లి కోర్టుకు బాంబు బెదిరింపు వచ్చిన నేపథ్యంలో భద్రతను పర్యవేక్షిస్తూనే అధికారులు విచారణను కొనసాగించారు.
ఈ కేసు నేపథ్యం 2021వ సంవత్సరానికి చెందింది. అప్పట్లో కరోనా సెకండ్ వేవ్ తీవ్రంగా ఉన్న సమయంలో, కోవిడ్ చికిత్సను ఆరోగ్యశ్రీ పథకంలో చేర్చాలని డిమాండ్ చేస్తూ సీతక్క మరియు అప్పటి ఎన్ఎస్యూఐ అధ్యక్షుడు బల్మూరి వెంకట్ హైదరాబాద్లోని ఇందిరా పార్క్ వద్ద ధర్నా చేపట్టారు. కరోనా రోగులకు ఉచిత సేవలు అందించాలని, బాధితులను ఆదుకోవాలని వారు అప్పటి ప్రభుత్వాన్ని కోరారు. అయితే, ఆ సమయంలో లాక్డౌన్ నిబంధనలు అమల్లో ఉన్నందున, నిబంధనలు ఉల్లంఘించారనే ఆరోపణలతో అప్పటి కేసీఆర్ సర్కార్ వీరిపై కేసులు నమోదు చేసింది.
ప్రస్తుతం ఈ కేసుకు సంబంధించిన సాక్ష్యాధారాల విచారణ కోర్టులో కొనసాగుతోంది. విచారణ అనంతరం కోర్టు వెలుపల మంత్రి సీతక్క మాట్లాడుతూ.. ప్రజా సమస్యల కోసం పోరాడినందుకు తమపై కేసులు పెట్టారని, న్యాయవ్యవస్థపై తమకు పూర్తి నమ్మకం ఉందని పేర్కొన్నారు. కరోనా కష్టకాలంలో పేదల పక్షాన నిలిచినందుకు గర్వపడుతున్నానని ఆమె వెల్లడించారు. ఈ కేసు తదుపరి విచారణను న్యాయస్థానం మరో తేదీకి వాయిదా వేసింది.
