తెలంగాణ ముఖ్యమంత్రి రేవంత్ రెడ్డి, రాష్ట్రంలోని స్టార్టప్లను ప్రోత్సహించడానికి ఒక ముఖ్యమైన ప్రకటన చేశారు. స్టార్టప్ల అభివృద్ధికి, వాటిని భవిష్యత్తులో యూనికార్న్ కంపెనీలుగా ఎదిగే స్థాయికి తీసుకెళ్లాలనే లక్ష్యంతో ₹1,000 కోట్ల భారీ స్టార్టప్ ఫండ్ను ప్రారంభించనున్నట్లు ఆయన ప్రకటించారు. హైదరాబాద్లోని టీ-హబ్లో నిర్వహించిన ‘గూగుల్ ఫర్ స్టార్టప్’ హబ్ ప్రారంభోత్సవ కార్యక్రమంలో పాల్గొన్న సీఎం, ఈ ఫండ్తో రాష్ట్ర స్టార్టప్ వ్యవస్థ మరింత బలోపేతం అవుతుందని విశ్వాసం వ్యక్తం చేశారు.
సీఎం రేవంత్ రెడ్డి మాట్లాడుతూ, స్టార్టప్లు విజయవంతం కావాలంటే సమిష్టి కృషి, పట్టుదల, స్పష్టమైన లక్ష్యం ముఖ్యమని పేర్కొన్నారు. ఫుట్బాల్ జట్టు ఉదాహరణ ఇస్తూ, జట్టు భావన, పట్టుదలతో పనిచేసినప్పుడు విజయం సాధ్యమవుతుందని, అదే తత్వం స్టార్టప్లకు కూడా వర్తిస్తుందని చెప్పారు. గూగుల్ కంపెనీ ఎలా ఒక చిన్న గ్యారేజీ నుంచి ప్రపంచ దిగ్గజంగా ఎదిగిందో గుర్తు చేస్తూ, తెలంగాణ యువత కూడా పెద్ద కలలు కనాలని, వాటిని నెరవేర్చే దిశగా ప్రభుత్వ మద్దతు ఉంటుందని హామీ ఇచ్చారు.
టీ-హబ్, ఇతర ఇన్క్యుబేటర్లను మరింత అభివృద్ధి చేసి, అంతర్జాతీయ సంస్థల దృష్టిని ఆకర్షించే ఎకోసిస్టమ్ను నిర్మిస్తున్నామని సీఎం తెలిపారు. ‘తెలంగాణ రైజింగ్ 2047 గ్లోబల్ సమ్మిట్’ విజయవంతంగా నిర్వహించడం కూడా ఈ లక్ష్యానికే భాగమని చెప్పారు. ఈ సమ్మిట్ ద్వారా తెలంగాణ బ్రాండ్ను ప్రపంచానికి పరిచయం చేసే అవకాశం దొరికిందని అన్నారు. గూగుల్ వంటి గ్లోబల్ కంపెనీలతో భాగస్వామ్యాలు తెలంగాణ అభివృద్ధికి దోహదం చేస్తాయని సీఎం తెలిపారు. గ్లోబల్ సమ్మిట్పై పూర్తి నివేదికను అందజేయడానికి తాను ఢిల్లీకి వెళ్లనున్నట్లు ఇదే సందర్భంలో వెల్లడించారు.
