ఆంధ్రప్రదేశ్ రాష్ట్ర పౌరసరఫరాల శాఖ మంత్రి నాదెండ్ల మనోహర్ సోమవారం ఢిల్లీలో కేంద్ర పౌరసరఫరాల శాఖ మంత్రి ప్రహ్లాద్ జోషితో సమావేశమయ్యారు. ఈ సందర్భంగా ధాన్యం సేకరణ మరియు ప్రజా పంపిణీ వ్యవస్థ (PDS) పనితీరుపై కేంద్ర మంత్రి ప్రశంసలు కురిపించారు. ముఖ్యంగా, కస్టమ్ మిల్లింగ్ రైస్ (CMR) ను సకాలంలో, స్థిరంగా కేంద్రానికి అందిస్తున్న ఏకైక రాష్ట్రం ఆంధ్రప్రదేశ్ అని ప్రహ్లాద్ జోషి కొనియాడారు. రాష్ట్రంలో ధాన్యం కొనుగోలు మరియు పంపిణీ వ్యవస్థలో చేపడుతున్న సంస్కరణలను మనోహర్ కేంద్రమంత్రికి వివరించారు.
2025-26 ఖరీఫ్ సీజన్కు గాను ఏపీకి 51 లక్షల మెట్రిక్ టన్నుల వరి సేకరణ లక్ష్యాన్ని కేంద్రం నిర్దేశించింది. ఈ దిశగా రాష్ట్ర ప్రభుత్వం వేగంగా పనిచేస్తూ కేవలం 25 రోజుల వ్యవధిలోనే 2.69 లక్షల మంది రైతుల నుంచి 17.37 లక్షల మెట్రిక్ టన్నుల ధాన్యాన్ని సేకరించినట్లు మంత్రి మనోహర్ తెలిపారు. రెవెన్యూ, వ్యవసాయ శాఖల సమన్వయంతో ధాన్యం కొనుగోలు చేసి, రైతులకు 24 గంటల్లోనే డబ్బులు వారి ఖాతాల్లో జమ చేస్తున్నామని వివరించారు. ఈ సందర్భంగా, ఏపీ ప్రభుత్వ పనితీరును అభినందించిన కేంద్రమంత్రి, జనవరి నుంచి రాష్ట్ర ప్రజలకు అదనంగా గోధుమలు మరియు రాగులు కేటాయించడానికి అంగీకరించారు.
సాంకేతికత వినియోగంలో ఏపీ ముందంజలో ఉందని మంత్రి మనోహర్ కేంద్రానికి తెలిపారు. ముఖ్యంగా, మధ్యాహ్న భోజన పథకం (MDM) బియ్యం సరఫరాలో పూర్తి పారదర్శకత కోసం క్యూఆర్ కోడ్ ఆధారిత బ్యాగ్ ట్రాకింగ్ వ్యవస్థను అమలు చేసిన దేశంలోనే మొట్టమొదటి రాష్ట్రంగా ఆంధ్రప్రదేశ్ నిలిచిందని పేర్కొన్నారు. ఈ విధానం ద్వారా రైతు, మిల్లర్, గోడౌన్ల నుంచి ప్రతి బస్తాను ట్రేస్ చేయవచ్చని వివరించారు. జనవరి నుంచి ఈ విధానాన్ని ప్రజా పంపిణీ వ్యవస్థ (PDS) బియ్యానికి కూడా అమలు చేస్తామని మంత్రి స్పష్టం చేశారు.
