జీహెచ్ఎంసీలో మున్సిపాలిటీల విలీనంపై తెలంగాణ బీజేపీ స్పందించింది. నగర పరిధిలోని 27 మున్సిపాలిటీలను జీహెచ్ఎంసీలో విలీనం చేయాలని రెండు రోజుల క్రితం తెలంగాణ మంత్రివర్గం నిర్ణయించింది. జీహెచ్ఎంసీని విస్తరించాలని మంత్రివర్గం నిర్ణయించినట్లు మంత్రి శ్రీధర్ బాబు మీడియా సమావేశంలో వెల్లడించారు.
ఈ నిర్ణయంపై తెలంగాణ బీజేపీ అధ్యక్షుడు రామచందర్ రావు స్పందిస్తూ, గ్రేటర్ హైదరాబాద్ మున్సిపల్ కార్పొరేషన్ (జీహెచ్ఎంసీ)లో మున్సిపాలిటీల విలీనాన్ని వ్యతిరేకిస్తున్నట్లు చెప్పారు. ఈ విలీనం అశాస్త్రీయంగా ఉందని ఆయన అన్నారు. కాంగ్రెస్ ప్రభుత్వం తన మిత్రపక్షం మజ్లిస్ పార్టీకి లబ్ధి చేకూర్చేందుకు మున్సిపాలిటీలను విలీనం చేస్తోందని ఆరోపించారు. ఈ నిర్ణయంపై ప్రభుత్వం పునరాలోచన చేయాలని సూచించారు.
