ఆంధ్రప్రదేశ్లో అరటి, పత్తి, మొక్కజొన్న రైతులు ఎదుర్కొంటున్న సమస్యలపై ముఖ్యమంత్రి నారా చంద్రబాబు నాయుడు అధికారులతో టెలికాన్ఫరెన్స్ నిర్వహించి కీలక ఆదేశాలు జారీ చేశారు. ధరల పతనం మరియు కొనుగోళ్లలో జాప్యం వంటి సమస్యల కారణంగా రైతులు నష్టపోకుండా తక్షణ చర్యలు చేపట్టాలని సీఎం స్పష్టం చేశారు. రైతులను ఆదుకునేందుకు తీసుకోవాల్సిన చర్యలపై ఆయన అధికారులతో సమీక్షించారు.
ముఖ్యంగా రాయలసీమలో సుమారు 40 వేల హెక్టార్లలో పండుతున్న అరటికి సరైన ధర లభించకపోవడంపై సీఎం దృష్టి సారించారు. డిసెంబరు మొదటి వారం వరకు ధరలు పెరిగే అవకాశం ఉన్నందున, అప్పటివరకు రైతులు నష్టపోకుండా ఉండేందుకు, రాయలసీమ అరటిని రైల్వే వ్యాగన్ల ద్వారా ముంబై, కలకత్తా వంటి ప్రధాన మార్కెట్లకు తరలించేందుకు తక్షణమే ఏర్పాట్లు చేయాలని అధికారులను ఆదేశించారు. అలాగే, ఉద్యాన, మార్కెటింగ్ శాఖ అధికారులు ప్రతిరోజూ వ్యాపారులతో సమావేశాలు నిర్వహించి, మార్కెట్ను నిరంతరం పర్యవేక్షించాలని సూచించారు.
మద్దతు ధర కంటే తక్కువకు అమ్ముకోవాల్సిన దుస్థితి నుంచి మొక్కజొన్న రైతులను గట్టెక్కించేందుకు ధరల స్థిరీకరణ నిధి ద్వారా ధరల వ్యత్యాసాన్ని చెల్లించే అంశాన్ని పరిశీలించాలని సీఎం ఆదేశించారు. ఇక పత్తి కొనుగోళ్లలో రైతులకు ఇబ్బందులు ఎదురైనా సహించేది లేదని హెచ్చరించారు. రానున్న వర్షాల దృష్ట్యా కొనుగోళ్లను వేగవంతం చేయాలని, రంగుమారిన, తడిచిన పత్తిని కూడా కొనుగోలు చేయాలని అధికారులకు స్పష్టమైన ఆదేశాలిచ్చారు. కొనుగోలు కేంద్రాలను ప్రతిరోజూ తనిఖీ చేసి, రైతులతో నేరుగా మాట్లాడి సమస్యలను పరిష్కరించాలని ముఖ్యమంత్రి దిశానిర్దేశం చేశారు.
