బీహార్ అసెంబ్లీ ఎన్నికల్లో ఆర్జేడీ పార్టీ ఓటమికి బాధ్యత వహిస్తూ, ఆ పార్టీ యువ నేత తేజస్వి యాదవ్ తొలుత అసెంబ్లీలో ప్రతిపక్ష నాయకుడి బాధ్యతను చేపట్టడానికి విముఖత చూపారు. ఇటీవలి ఎన్నికల్లో ఎన్డీయే కూటమి విజయం సాధించగా, ఆర్జేడీ కేవలం 25 స్థానాలకే పరిమితమైంది. ఈ ఓటమికి పూర్తి బాధ్యత తానే వహిస్తానని పేర్కొన్న తేజస్వి, తాను ప్రస్తుతానికి ఎమ్మెల్యేగా మాత్రమే పనిచేయాలని అనుకుంటున్నానని సోమవారం జరిగిన సమీక్షా సమావేశంలో పార్టీ వర్గాలతో అన్నట్లు సమాచారం.
అయితే, పార్టీ వ్యవస్థాపక అధ్యక్షుడు, తేజస్వి తండ్రి అయిన లాలూ ప్రసాద్ యాదవ్ ఈ విషయంలో జోక్యం చేసుకున్నారు. పార్టీని ముందుండి సమర్థవంతంగా నడిపించడానికి అసెంబ్లీలో ప్రతిపక్ష నేత బాధ్యతలు తీసుకోవడం చాలా అవసరమని ఆయన తేజస్వికి నచ్చజెప్పారు. తండ్రి మాటతో ఏకీభవించిన తేజస్వి యాదవ్, చివరకు ఆ పదవిలో కొనసాగేందుకు అంగీకరించినట్లు పార్టీ వర్గాలు వెల్లడించాయి.
ఈ పరిణామాల మధ్యే, కొత్తగా ఎన్నికైన 25 మంది ఆర్జేడీ ఎమ్మెల్యేలు తమ శాసనసభాపక్ష నేతగా తేజస్వి యాదవ్‌ను ఏకగ్రీవంగా ఎన్నుకున్నారు. ఈ విషయంపై ఆర్జేడీ అధికార ప్రతినిధి శక్తి సింగ్ ధృవీకరించారు.
