ముంబైలోని పొవై ప్రాంతంలో, ఒక వ్యక్తి ఆడిషన్ కోసం వచ్చిన 8 నుంచి 14 ఏళ్ల మధ్య వయసున్న 17 మంది పిల్లలను స్టూడియోలో బంధించడం తీవ్ర కలకలం రేపింది. పోలీసులు హుటాహుటిన సంఘటనా స్థలానికి చేరుకుని చిన్నారులను రక్షించడానికి ఆపరేషన్ చేపట్టారు. పిల్లలు రూమ్ అద్దాల నుంచి బయటకు చూస్తూ సహాయం కోసం ఏడవడంతో పరిస్థితి ఉద్రిక్తంగా మారింది. పోలీసులు సుమారు రెండున్నర గంటల పాటు నిందితుడు రోహిత్‌తో మాట్లాడే ప్రయత్నాలు చేశారు.
చిన్నారులను బంధించడానికి గల కారణాలను తెలుసుకోవాలని పోలీసులు ప్రయత్నించగా, తాను కొందరిని పలు ప్రశ్నలు అడగాలనుకుంటున్నానని రోహిత్ చెప్పాడు. తాను తీవ్రవాదిని కానని, డబ్బులు కూడా అవసరం లేదని స్పష్టం చేశాడు. తనను రెచ్చగొడితే ఆ ప్రదేశాన్ని మంటల్లో తగలబెడతానని బెదిరింపులకు దిగాడు. ఈ చర్య తన ‘ప్రశ్నలు’ లేదా ‘గ్రీవెన్సులు’పై దృష్టి మళ్లించడానికి ఉద్దేశించినదని తెలుస్తోంది. రోహిత్ ఒక వ్యాపారవేత్త అని, 2017 వరకు పుణేలో ఉండి ఆ తర్వాత నుంచి ముంబైలో ఉంటున్నట్లు పోలీసులు తెలిపారు.
నిందితుడి నుంచి పెరుగుతున్న బెదిరింపుల నేపథ్యంలో, పోలీసులు స్టూడియోలోకి ప్రవేశించి రోహిత్‌ను అరెస్ట్ చేయడానికి ప్రయత్నించారు. ఈ ఆపరేషన్ సందర్భంగా జరిగిన కాల్పుల్లో రోహిత్ మృతి చెందాడు. కాల్పుల్లో గాయపడిన రోహిత్‌ను ఆసుపత్రికి తరలించగా, అక్కడ అతను చనిపోయాడు. ఈ సంక్షోభంలో బందీలుగా ఉన్న 17 మంది పిల్లలను పోలీసులు సురక్షితంగా రక్షించారు.
