శ్రీశైలం డ్యామ్ సమీపంలో చిరుత పులి ప్రత్యక్షమవడంతో ఆ ప్రాంతంలో తీవ్ర ఆందోళన నెలకొంది. జలాశయం పక్కన ఉన్న కేవీ స్విచ్ యార్డ్ వద్ద గత రెండు రోజులుగా చిరుత సంచరిస్తోందని సమాచారం. రాత్రివేళల్లో ఈ చిరుత పులి కుక్కలపై దాడులు జరపడంతో స్థానికులు, ముఖ్యంగా స్విచ్ యార్డ్ సిబ్బంది భయాందోళనతో విధుల్లో పనిచేస్తున్నారు. చిరుత సంచరిస్తున్న వీడియోలు సోషల్ మీడియాలో వైరల్ కావడంతో ప్రజల్లో భయం మరింత పెరిగింది.
ఘటనపై సమాచారం అందుకున్న అటవీశాఖ అధికారులు వెంటనే సంఘటన స్థలానికి చేరుకున్నారు. వారు చిరుత పులి కదలికలను పర్యవేక్షించేందుకు సీసీ కెమెరాలు, ట్రాప్ కేజ్‌లు ఏర్పాటు చేశారు. చిరుత పులిని సురక్షితంగా పట్టుకుని అటవీ ప్రాంతానికి తరలించే చర్యలు వేగవంతంగా కొనసాగుతున్నాయి. ఆహారం కోసం అడవి జంతువులు గ్రామాల వైపు వస్తుండటమే ఇటువంటి ఘటనలకు కారణమని నిపుణులు అభిప్రాయపడుతున్నారు.
అటవీశాఖ అధికారులు స్థానికులను అప్రమత్తంగా ఉండాలని, ముఖ్యంగా రాత్రివేళల్లో బయటకు వెళ్లకూడదని సూచించారు. పిల్లలు, పశువులు బయట తిరగకుండా తగిన జాగ్రత్తలు తీసుకోవాలని తెలిపారు. అధికారులు ప్రస్తుతం ఆ ప్రాంతంలో నిరంతర నిఘా కొనసాగిస్తూ, ప్రజలు భయపడవద్దని, కానీ అవసరమైన భద్రతా చర్యలు తప్పక పాటించాలని సూచనలు జారీ చేశారు.
