మెగాస్టార్ చిరంజీవి నివాసంలో దీపావళి వేడుకలు అత్యంత ఘనంగా జరిగాయి. ఈ వేడుకల్లో చిరంజీవి ఆప్త మిత్రులైన కింగ్ అక్కినేని నాగార్జున, అమల దంపతులు, అలాగే విక్టరీ వెంకటేష్ దంపతులు ముఖ్య అతిథులుగా పాల్గొని సందడి చేశారు. వీరితో పాటు ప్రముఖ హీరోయిన్ నయనతార కూడా ఈ సంబరాల్లో పాలుపంచుకున్నారు. ఈ స్టార్ హీరోల మధ్య ఉన్న బలమైన స్నేహబంధం, వారి కుటుంబాలతో కలిసి పండుగ చేసుకోవడం సినీ అభిమానులను ఎంతగానో ఆకట్టుకుంది.
ఈ వేడుకలకు సంబంధించిన ఫోటోలను చిరంజీవి తన అధికారిక సోషల్ మీడియా వేదికగా పంచుకున్నారు. ఈ సందర్భంగా ఆయన తన సంతోషాన్ని వ్యక్తపరుస్తూ ఒక పోస్ట్‌ పెట్టారు. “నా ప్రియమైన స్నేహితులు నాగార్జున, వెంకటేష్.. నా కోస్టార్ నయనతార మా ఫ్యామిలీతో కలిసి దీపావళి పండుగను జరుపుకోవడం చాలా ఆనందంగా ఉంది. ఇలాంటి క్షణాలు హృదయాన్ని ఆనందంతో నింపుతాయి” అని చిరంజీవి పేర్కొన్నారు.
చిరంజీవి, నాగార్జున, వెంకటేష్ దంపతులు కలిసి ఉన్న ఈ ఫోటోలు ప్రస్తుతం సోషల్ మీడియాలో వైరల్ అవుతున్నాయి. తెలుగు సినీ పరిశ్రమలోని ఈ అగ్ర హీరోలు తమ వృత్తిపరమైన బంధాలతో పాటు వ్యక్తిగత జీవితంలోనూ సన్నిహితంగా ఉండటం, ఇలాంటి పండుగ వేడుకలను తమ కుటుంబాలతో కలిసి జరుపుకోవడం అభిమానులకు ఎంతో ఆనందాన్ని పంచుతోంది. ఈ వేడుక జీవితాన్ని ప్రకాశవంతంగా చేసే ప్రేమ, చిరునవ్వులు, ఐక్యతను గుర్తు చేసిందని చిరంజీవి తెలిపారు.
