నిజామాబాద్‌లో కానిస్టేబుల్ ప్రమోద్ హత్య కేసులో నిందితుడైన రియాజ్ ఎన్‌కౌంటర్ ఘటనపై రాష్ట్ర డీజీపీ శివధర్ రెడ్డి స్పందించారు. రియాజ్ ఎన్‌కౌంటర్‌లో మరణించాడని డీజీపీ ధృవీకరించారు. రియాజ్‌కు గాయాలవ్వడంతో అతన్ని నిన్న అదుపులోకి తీసుకుంటుండగా ప్రభుత్వ ఆసుపత్రికి తరలించి చికిత్స అందిస్తున్నారు. ఆసుపత్రిలో చికిత్స పొందుతున్న రియాజ్, బాత్‌రూమ్‌కు వెళ్లి వస్తానని చెప్పి బయటకు వచ్చి, కాపలాగా ఉన్న ఏఆర్ కానిస్టేబుల్ వద్ద ఉన్న వెపన్‌ను లాక్కునేందుకు ప్రయత్నించాడని డీజీపీ తెలిపారు.
రియాజ్ ఏఆర్ కానిస్టేబుల్ వద్ద ఉన్న గన్‌ను లాక్కుని కాల్పులు జరపడానికి ప్రయత్నించగా, పోలీసులు వెంటనే అతనిపై ఎదురు కాల్పులు జరపాల్సి వచ్చిందని డీజీపీ శివధర్ రెడ్డి వివరించారు. రియాజ్ కాల్పులు జరపడం వల్లనే పోలీసులు ఆత్మరక్షణ కోసం, ప్రజల ప్రాణాలను కాపాడేందుకు ఎదురు కాల్పులు జరపాల్సి వచ్చిందని ఆయన పేర్కొన్నారు. తాము కాల్పులు జరపకపోతే, ప్రభుత్వ ఆసుపత్రికి వచ్చిన రోగుల ప్రాణాలు కోల్పోయేవారని డీజీపీ అన్నారు.
ఈ నేపథ్యంలోనే, ప్రజల ప్రాణాలను కాపాడే ప్రయత్నంలో భాగంగా తప్పనిసరి పరిస్థితుల్లోనే ఈ ఎన్‌కౌంటర్ జరిగిందని డీజీపీ తెలిపారు. రియాజ్ ఈ నెల 17న కానిస్టేబుల్ ప్రమోద్ హత్య కేసులో ప్రధాన నిందితుడు. ఈ ఘటనపై పోలీసులు ఇప్పటికే ధృవీకరించారు. ఎన్‌కౌంటర్‌కు దారితీసిన పరిస్థితుల గురించి డీజీపీ శివధర్ రెడ్డి వివరణ ఇచ్చారు.
