తిరుపతి శ్రీ వేంకటేశ్వర అగ్రికల్చర్ కాలేజీ విద్యార్థులు చదువుతో పాటు చేతినిండా సంపాదిస్తున్నారు. బీఎస్సీ అగ్రికల్చర్ నాలుగేళ్ల కోర్సులో భాగంగా మూడేళ్లు తరగతి గదిలో పాఠాలు విన్న తర్వాత చివరి ఏడాదిలో వీరు క్షేత్రస్థాయిలో వ్యవసాయం చేస్తున్నారు. ‘ఎక్స్‌పీరియన్సియల్‌ లెర్నింగ్‌ ప్రొగ్రాం’ (ఈఎల్‌పీ) కింద విద్యార్థులను టీమ్‌లుగా విభజించి, కాలేజీ పొలంలో అర ఎకరం నుంచి రెండెకరాల వరకు కేటాయిస్తారు. వీరికి నాణ్యమైన విత్తనాలతో పాటు ఒక్కో టీమ్‌కు రూ. 20 వేల ఆర్థిక సహాయం అందిస్తారు. విత్తనాలు నాటడం నుంచి దిగుబడి వచ్చే వరకు విద్యార్థులదే బాధ్యతగా ఉంటుంది. ఈ అనుభవంతో వ్యవసాయంపై వారికి పూర్తి అవగాహన లభిస్తుంది.
విద్యార్థులు మొక్కజొన్న, వేరుశనగ, నువ్వులు, కందులు వంటి పంటలను పండిస్తున్నారు. అంతేకాక, వారు పండించిన వేరుశనగ, నువ్వుల నుంచి నూనెలు తీయడం, చిక్కీలు, జామ్, నన్నారి, జ్యూస్, నిప్పట్లు, పిండి వంటకాలు, వర్మీ కంపోస్టు వంటి ఉత్పత్తులను కూడా తయారు చేసి విక్రయిస్తున్నారు. ఈ ఉత్పత్తుల అమ్మకం ద్వారా వచ్చిన ఆదాయంలో 75 శాతం విద్యార్థులకే చెందుతుంది, మిగిలిన 25 శాతం కాలేజీకి కేటాయిస్తారు. తద్వారా విద్యార్థులు చదువుకుంటూనే డబ్బు సంపాదించే అద్భుతమైన అవకాశం లభిస్తోంది.
ఈఎల్‌పీతో పాటు, కోర్సులో చివరి ఐదు నెలల్లో ‘గ్రామీణ కృషి పని అనుభవ పథకం’ (రావెప్‌) కింద విద్యార్థులు నెల్లూరు, అన్నమయ్య, కడప జిల్లాల్లోని కృషి విజ్ఞాన కేంద్రాల్లో పర్యటించి, రైతుల జీవనాన్ని, క్షేత్రస్థాయి పరిస్థితులను పరిశీలించే అవకాశం కల్పిస్తారు. అలాగే, మరో నెల రోజులు విత్తన సంస్థలు, ఇతర వ్యవసాయ ఉత్పత్తుల సంస్థల్లో ఇంటర్న్‌షిప్‌ చేయాల్సి ఉంటుంది. ఈ కార్యక్రమాలు విద్యార్థులకు వ్యవసాయం, మార్కెటింగ్‌పై పూర్తి అవగాహనను పెంచి, భవిష్యత్తుకు మార్గనిర్దేశం చేస్తున్నాయి.
