ధ్రువ్ విక్రమ్ కథానాయకుడిగా, సంచలన దర్శకుడు మారి సెల్వరాజ్ దర్శకత్వంలో రూపొందుతున్న చిత్రం ‘బైసన్’. ‘కర్ణన్’, ‘మామన్నన్’ వంటి విజయవంతమైన చిత్రాలతో తనకంటూ ప్రత్యేక గుర్తింపు తెచ్చుకున్న మారి సెల్వరాజ్ నుంచి వస్తున్న ఈ సినిమాపై భారీ అంచనాలు నెలకొన్నాయి. ఈ చిత్రాన్ని దీపావళి పండుగ సందర్భంగా ఈ నెల 17న తెలుగు, తమిళ భాషల్లో ఏకకాలంలో విడుదల చేయనున్నట్లు చిత్రబృందం ప్రకటించింది. ఈ సందర్భంగా విడుదల చేసిన ట్రైలర్ ప్రేక్షకులను ఆకట్టుకుంటోంది.
తాజాగా విడుదలైన ట్రైలర్ ఈ సినిమా కబడ్డీ క్రీడా నేపథ్యంలో సాగే ఒక పవర్‌ఫుల్ డ్రామా అని స్పష్టం చేస్తోంది. కథ 1980ల నాటి తమిళ గ్రామీణ వాతావరణంలో చూపించనున్నారు. ధ్రువ్ విక్రమ్ ఇందులో ఓ పల్లెటూరి కబడ్డీ ఆటగాడిగా శక్తిమంతమైన పాత్రలో కనిపించబోతున్నాడు. ఒక కబడ్డీ ఆటగాడి జీవితంలోని సంఘర్షణ, సమాజంలో అణగారిన వర్గాలు ఎదుర్కొనే వివక్ష, దానిపై వారు చేసే తిరుగుబాటు వంటి సామాజిక అంశాలను మారి సెల్వరాజ్ తనదైన వాస్తవిక శైలిలో కళ్లకు కట్టనున్నట్లు ట్రైలర్ ద్వారా తెలుస్తోంది.
ఈ సినిమాలో ధ్రువ్ విక్రమ్ సరసన అనుపమ పరమేశ్వరన్ హీరోయిన్‌గా నటిస్తున్నారు. లాల్, పశుపతి, రజిషా విజయన్, అమీర్ వంటి ప్రముఖ నటులు కీలక పాత్రల్లో కనిపించనున్నారు. కబడ్డీ ఆటతో పాటు సామాజిక అంశాలను జోడించి మారి సెల్వరాజ్ తెరకెక్కిస్తున్న ఈ ‘బైసన్’ చిత్రం విడుదల కోసం ప్రేక్షకులు ఆసక్తిగా ఎదురుచూస్తున్నారు.
