పండగ సీజన్ సమీపిస్తున్న తరుణంలో, ప్రముఖ కార్ల తయారీ సంస్థ హ్యుందాయ్ మోటార్ ఇండియా వినియోగదారులకు ఓ శుభవార్త అందించింది. కేంద్ర ప్రభుత్వం చేపట్టిన జీఎస్టీ సంస్కరణల ప్రయోజనాన్ని పూర్తిగా కస్టమర్లకు బదిలీ చేస్తూ, తమ ప్యాసింజర్ వాహనాల ధరలను భారీగా తగ్గిస్తున్నట్లు ఆదివారం ప్రకటించింది. ఈ తగ్గింపుతో హ్యుందాయ్ కార్లు గరిష్ఠంగా రూ. 2.4 లక్షల వరకు తగ్గింపుతో చౌకగా లభించనున్నాయి.
సెప్టెంబర్ 22 నుంచి ఈ కొత్త ధరలు దేశవ్యాప్తంగా అమల్లోకి రానున్నాయని కంపెనీ స్పష్టం చేసింది. ఈ ధరల కోతలో భాగంగా, హ్యుందాయ్ ఫ్లాగ్‌షిప్ ఎస్‌యూవీ అయిన టక్సన్‌పై అత్యధికంగా రూ. 2,40,303 వరకు తగ్గింపు లభించనుంది. దీంతో పాటు మార్కెట్లో అత్యంత ప్రజాదరణ పొందిన గ్రాండ్ ఐ10 నియోస్, ఆరా, ఎక్స్‌టర్, ఐ20, వెన్యూ, వెర్నా, క్రెటా, అల్కాజార్ వంటి ఇతర మోడళ్ల ధరలు కూడా సుమారు రూ. 60,000 నుంచి రూ. 1.2 లక్షల శ్రేణిలో తగ్గనున్నాయి.
ఇటీవల జరిగిన 56వ జీఎస్టీ కౌన్సిల్ సమావేశంలో ప్యాసింజర్ వాహనాలపై పన్నులను సవరించాలని కేంద్ర ప్రభుత్వం నిర్ణయించింది. దీని ప్రకారం, చిన్న కార్లపై జీఎస్టీని 28 శాతం నుంచి 18 శాతానికి తగ్గించారు. ఈ సంస్కరణల కారణంగా తగ్గిన పన్ను భారాన్ని నేరుగా వినియోగదారులకు అందించాలని హ్యుందాయ్ నిర్ణయించింది. ఈ నిర్ణయం ఆటోమొబైల్ రంగానికి మరింత ఊతమిస్తుందని కంపెనీ భావిస్తోంది.
ఈ సందర్భంగా హ్యుందాయ్ మోటార్ ఇండియా మేనేజింగ్ డైరెక్టర్ ఉన్సూ కిమ్ మాట్లాడుతూ, “ప్రభుత్వం తీసుకున్న ఈ ముందుచూపుతో కూడిన నిర్ణయాన్ని మేము మనస్ఫూర్తిగా స్వాగతిస్తున్నాం” అని తెలిపారు. ఈ సంస్కరణ ఆటో పరిశ్రమకు ప్రోత్సాహాన్ని ఇవ్వడమే కాకుండా, లక్షలాది మంది భారతీయులకు సొంత వాహన కలను మరింత అందుబాటులోకి తెస్తుందని ఆయన అభిప్రాయపడ్డారు. పండగ సీజన్‌లో ఈ ధరల తగ్గింపు అమ్మకాలను గణనీయంగా పెంచుతుందని కంపెనీ ధీమా వ్యక్తం చేస్తోంది.
