పేపర్ లీక్ పై భట్టి సంచలన వ్యాఖ్యలు
ఇటీవల టీఎస్పీఎస్సీ పేపర్ లీక్ కావడం.. అనంతరం పదవ తరగతి పరీక్ష పేపర్లు లీక్ కావడం రాష్ట్రవ్యాప్తంగా దుమారం రేపుతోంది. ఈ క్రమంలో బీఆర్ఎస్, బీజేపీ నేతలు ఒకరికొకరు తీవ్ర విమర్శలు చేసుకున్నారు. తాజాగా కాంగ్రెస్ నేత భట్టి విక్రమార్క ఆ రెండు పార్టీలను విమర్శించారు. రాష్ట్రంలో డైవర్షన్ పాలిటిక్స్ నడుస్తున్నాయని వ్యాఖ్యానించారు. బీజేపీ, బీఆర్ఎస్ పార్టీలు రాష్ట్ర ప్రజలను మభ్యపెట్టి మోసం చేసేందుకు ప్రయత్నం చేస్తున్నాయని..అందుకే ఈ లీకుల లొల్లిలు జరుగుతున్నాయని ఆరోపించారు. ప్రజల సమస్యలను పక్కదోవ పట్టించానికే ఈ రెండు పార్టీలు నాటకాలడుతున్నాయని విమర్శించారు. మీడియా దృష్టి వారిపై పడేలా ఉండేందుకే కావాలనే ఈ గందరగోళాన్ని సృష్టిస్తున్నాయని ధ్వజమెత్తారు.
గ్రూప్ 1 పేపర్ లీక్ వ్యవహారాన్ని చర్చకు రానివ్వకుండా.. లోతుగా దర్యాప్తు జరగకుండా చూసేందుకే ఈ రెండు పార్టీలు డైవర్షన్ రాజకీయ కుట్రలు చేస్తున్నాయని భట్టీ మండిపడ్డారు. అర్ధరాత్రి ఒంటి గంటకు బండి సంజయ్ వద్దకు వెళ్లి ఆయన్ని అరెస్టు చేయాల్సిన అవసరం లేదని వ్యాఖ్యనించారు. రాష్ట్రంలో అసలు సమస్యలు బయటపడకుండా చేసేందుకే రాజకీయ కుట్రలు చేస్తున్నారని ఆరోపించారు.
