టాలీవుడ్ సర్కిల్స్‌లో, సోషల్ మీడియాలో గత కొద్ది రోజులుగా ఒకటే హాట్ టాపిక్. ఐకాన్ స్టార్ అల్లు అర్జున్, టాలెంటెడ్ డైరెక్టర్ అట్లీ కలిసి ఒక భారీ పాన్-ఇండియన్ సినిమా చేయబోతున్నారనే వార్తలతో పాటు, ఆ సినిమాలో సమంత ఒక ముఖ్యమైన పాత్రలో కనిపించనుందనే ఊహాగానాలు జోరందుకున్నాయి. “సన్ ఆఫ్ సత్యమూర్తి”లో వీరిద్దరి హిట్ కాంబినేషన్, ఆ తర్వాత “పుష్ప: ది రైజ్”లో “ఊ అంటావా మావా” సాంగ్‌లో వారి స్క్రీన్ ప్రెజెన్స్ ప్రేక్షకులను విశేషంగా ఆకట్టుకోవడంతో ఈ వార్తలకు మరింత క్రేజ్ వచ్చింది. అభిమానులు మళ్లీ ఈ ఇద్దరినీ ఒకే ఫ్రేమ్‌లో చూడాలని ఎంతో ఆశగా ఎదురు చూశారు.
క్లారిటీ ఇచ్చిన సామ్…
అయితే, ఈ ఊహాగానాలకు స్వయంగా సమంత తెరదించారు. తన సోషల్ మీడియా ద్వారా ఆమె స్పందిస్తూ, “అట్లీ నాకెంతో క్లోజ్ ఫ్రెండ్! కానీ #AA22xA6 ప్రాజెక్ట్‌లో నేను నటిస్తున్నాననే వార్తలో ఎలాంటి నిజం లేదు” అని కుండబద్దలు కొట్టినట్లు తేల్చి చెప్పేశారు. దీంతో, అల్లు అర్జున్ – అట్లీ సినిమాలో సమంత నటిస్తుందంటూ చక్కర్లు కొట్టిన వార్తలకు ఒక స్పష్టమైన ఎండ్ కార్డ్ పడినట్టయింది. సమంత తన సన్నిహితుడైన అట్లీతో భవిష్యత్తులో కలిసి పనిచేసే అవకాశం ఉన్నప్పటికీ, ఈ ప్రత్యేక ప్రాజెక్ట్‌లో మాత్రం ఆమె భాగం కావడం లేదని తేలిపోయింది. దీంతో, ఈ సినిమాలో హీరోయిన్ ఎవరై ఉంటారనే ప్రశ్న మళ్లీ తెరపైకి వచ్చింది.
ఈ సినిమాలో హీరోయిన్..వారి పేర్లు తెరపైకి ..
ప్రస్తుత సమాచారం ప్రకారం, దర్శకుడు అట్లీ ఈ ప్రతిష్టాత్మక చిత్రం కోసం బాలీవుడ్‌లోని పలువురు స్టార్ హీరోయిన్లతో చర్చలు జరుపుతున్నట్లు తెలుస్తోంది. యంగ్ అండ్ టాలెంటెడ్ నటీమణులు జాన్వీ కపూర్, ఫిట్‌నెస్ ఫ్రీక్ దిశా పటాని, అలాగే బ్యూటిఫుల్ హీరోయిన్ శ్రద్ధా కపూర్ పేర్లు ప్రధానంగా వినిపిస్తున్నాయి. అంతేకాకుండా, ఈ సినిమాలో ఒక క్రేజీ బాలీవుడ్ స్టార్ ప్రతినాయకుడి పాత్రను పోషించే అవకాశం కూడా ఉందని టాక్ వినిపిస్తోంది.ఈ భారీ బడ్జెట్ చిత్రాన్ని ప్రముఖ నిర్మాణ సంస్థ సన్ పిక్చర్స్ నిర్మిస్తోంది. ఈ సినిమా ఒక ఆసక్తికరమైన పునర్జన్మల కాన్సెప్ట్‌తో తెరకెక్కనుందని సమాచారం. రాక్ స్టార్ దేవి శ్రీ ప్రసాద్ కాకుండా, టాలెంటెడ్ మ్యూజిక్ డైరెక్టర్ సాయి అభ్యంకర్ ఈ చిత్రానికి సంగీతం అందించనున్నారు.
సమంత ఈ క్రేజీ ప్రాజెక్ట్ లేదని తెలియడంతో ఆమె అభిమానులు కొంత నిరాశకు గురైనప్పటికీ, అల్లు అర్జున్ – అట్లీ వంటి ఇద్దరు పవర్ హౌస్ టాలెంట్స్ కలిసి ఎలాంటి మ్యాజిక్ క్రియేట్ చేస్తారో చూడటానికి మాత్రం వారు ఎంతో ఆసక్తిగా ఎదురు చూస్తున్నారు. త్వరలోనే ఈ సినిమాకు సంబంధించిన మరిన్ని అధికారిక ప్రకటనలు వస్తాయని ఆశిస్తున్నారు అభిమానులు. అప్పటివరకు, ఈ భారీ ప్రాజెక్ట్‌లో ఎవరు భాగం కానున్నారో తెలుసుకోవడానికి వేచి చూడాల్సిందే..
