పహల్గామ్‌లో జరిగిన ఘోర ఉగ్రదాడికి ప్రతీకారంగా, భారత సైన్యం, నౌకాదళం మరియు వైమానిక దళాలు బుధవారం తెల్లవారుజామున సంయుక్తంగా ‘ఆపరేషన్ సిందూర్’ చేపట్టాయి. ఈ ఆపరేషన్‌లో భాగంగా పాకిస్థాన్ మరియు పాక్ ఆక్రమిత కాశ్మీర్ (పీఓకే)లోని తొమ్మిది ఉగ్రవాద లక్ష్యాలపై కచ్చితమైన క్షిపణి దాడులు జరిపినట్లు సైనిక వర్గాలు వెల్లడించాయి. 1971 యుద్ధం తర్వాత పాకిస్థాన్‌పై మూడు రక్షణ దళాలు కలిసికట్టుగా దాడి చేయడం ఇదే ప్రథమం కావడం గమనార్హం.
రెండు వారాల క్రితం పహల్గామ్‌లో జరిగిన ఉగ్రదాడిలో అత్యధికులు పర్యాటకులు కాగా, మొత్తం 26 మంది ప్రాణాలు కోల్పోయిన విషయం తెలిసిందే. ఈ దాడికి ప్రతీకారం తీర్చుకుంటామని ప్రధాని నరేంద్ర మోదీ శపథం చేశారు. దీనికి అనుగుణంగా, బుధవారం తెల్లవారుజామున 1:44 గంటలకు ‘ఆపరేషన్ సిందూర్’ పేరిట ఈ సైనిక చర్యలు ప్రారంభమయ్యాయి. “భారత్‌పై ఉగ్రదాడులకు ప్రణాళికలు రచించి, వాటిని అమలు చేస్తున్న పాకిస్థాన్ మరియు పీఓకేలోని ఉగ్రవాద మౌలిక సదుపాయాలను ఈ ఆపరేషన్ ద్వారా లక్ష్యంగా చేసుకున్నామని” సైన్యం ఒక పత్రికా ప్రకటనలో స్పష్టం చేసింది.
ఈ దాడులలో త్రివిధ దళాలకు చెందిన కచ్చితత్వంతో కూడిన దాడి ఆయుధ వ్యవస్థలను ఉపయోగించినట్లు విశ్వసనీయ వర్గాలు తెలిపాయి. లక్ష్యాన్ని ఛేదించి, విధ్వంసం సృష్టించే కామికేజ్ డ్రోన్లు (లోయిటరింగ్ అమ్యూనిషన్స్) కూడా ఈ దాడుల్లో వినియోగించినట్లు సమాచారం. మొత్తం తొమ్మిది ఉగ్ర స్థావరాలను లక్ష్యంగా చేసుకున్నామని, అయితే “పాకిస్థాన్ సైనిక స్థావరాలపై ఎలాంటి దాడులు జరపలేదని” సైన్యం నొక్కి చెప్పింది. “లక్ష్యాల ఎంపికలోనూ, దాడుల నిర్వహణలోనూ భారత్ చాలా సంయమనం పాటించింది” అని సైన్యం పేర్కొంది.
ధ్వంసం చేసిన తొమ్మిది లక్ష్యాలలో బహవల్పూర్‌లోని జైషే మహ్మద్ ప్రధాన కార్యాలయం, మురిద్కేలోని లష్కరే తోయిబా స్థావరం కూడా ఉన్నాయని సంబంధిత వర్గాలు వెల్లడించాయి. ప్రధాని నరేంద్ర మోదీ రాత్రంతా ఈ ఆపరేషన్‌ను స్వయంగా పర్యవేక్షించినట్లు తెలిసింది. ఆపరేషన్ ముగిసిన వెంటనే, జాతీయ భద్రతా సలహాదారు అజిత్ దోవల్, అమెరికా జాతీయ భద్రతా సలహాదారు మరియు విదేశాంగ కార్యదర్శి మార్కో రూబియోలతో ఫోన్‌లో మాట్లాడి, తీసుకున్న చర్యల గురించి వివరించినట్లు సమాచారం. ‘ఆపరేషన్ సిందూర్’ పై పూర్తి వివరాలతో కూడిన ప్రకటనను సైన్యం త్వరలో విడుదల చేయనుంది.
