భారత రక్షణ వ్యవస్థను మరింత పటిష్టం చేసే దిశగా కీలక అడుగు పడింది. పొరుగు దేశాల నుంచి పొంచి ఉన్న ముప్పును సమర్థంగా ఎదుర్కొనేందుకు, ముఖ్యంగా స్వల్ప శ్రేణి వాయు రక్షణ సామర్థ్యాన్ని గణనీయంగా పెంచుకునేందుకు భారత్ చర్యలు చేపట్టింది. ఇందులో భాగంగా రష్యా నుంచి అత్యాధునిక ఇగ్లా-ఎస్ వెరీ షార్ట్ రేంజ్ ఎయిర్ డిఫెన్స్ (VSHORAD) క్షిపణులను సేకరించింది. ఇప్పటికే కొంత స్టాక్ భారత్‌కు చేరగా, వీటిని వినియోగానికి సిద్ధం చేస్తున్నట్లు సమాచారం.
సైనిక దళాలకు ప్రభుత్వం కల్పించిన అత్యవసర సేకరణ అధికారాలను ఉపయోగించి ఈ క్షిపణులను కొనుగోలు చేసినట్లు తెలుస్తోంది. కొన్ని వారాల క్రితమే ఈ ఆయుధ వ్యవస్థలు భారత్‌కు చేరాయి. శత్రువులకు చెందిన యుద్ధ విమానాలు, హెలికాప్టర్లు, మానవరహిత డ్రోన్లు వంటి గగనతల లక్ష్యాలను తక్కువ ఎత్తులోనే గుర్తించి, ధ్వంసం చేయగల శక్తి ఈ ఇగ్లా-ఎస్ క్షిపణులకు ఉంది. ప్రాథమిక సమాచారం ప్రకారం, సుమారు రూ. 260 కోట్ల వ్యయంతో ఈ కొనుగోలు జరిగినట్లు అంచనా. ముఖ్యంగా దేశ పశ్చిమ సెక్టార్‌లోని సరిహద్దుల వెంబడి వీటిని మోహరించే అవకాశాలున్నాయని రక్షణ వర్గాలు సూచిస్తున్నాయి.
ఈ క్రమంలోనే, వాయు రక్షణ సామర్థ్యాన్ని మరింత బలోపేతం చేసేందుకు భారత సైన్యం తాజాగా మరో ముందడుగు వేసింది. ఫాస్ట్ ట్రాక్ ప్రొక్యూర్‌మెంట్ పద్ధతిలో కొత్తగా 48 లాంచర్లు, 90 ఇగ్లా-ఎస్ క్షిపణుల కొనుగోలు కోసం టెండర్‌ను విడుదల చేసింది. ఈ ఆయుధ వ్యవస్థలు ఇప్పటికే భారత వాయుసేన అమ్ములపొదిలో కూడా ఉండటం గమనార్హం. దళాలను నిరంతరం యుద్ధ సన్నద్ధతతో ఉంచడంలో భాగంగా ఆయుధాలు, విడిభాగాల సేకరణను ఫాస్ట్‌ట్రాక్ పద్ధతిలో చేపట్టడం ఇటీవల కాలంలో పెరిగింది.
భారత సైన్యం 1990ల నుంచే ఇగ్లా క్షిపణులను వినియోగిస్తోంది. కాలక్రమేణా వీటిని ఆధునీకరించి ఇగ్లా-ఎస్ వెర్షన్‌ను అభివృద్ధి చేశారు. ముఖ్యంగా, పొరుగున ఉన్న పాకిస్థాన్ సైన్యం పలు రకాల డ్రోన్లు, మానవరహిత వైమానిక వాహనాలను (UAV) వినియోగిస్తున్న నేపథ్యంలో, వాటిని సమర్థంగా ఎదుర్కోవడానికి ఇగ్లా-ఎస్ వంటి స్వల్ప శ్రేణి క్షిపణులు అత్యంత కీలకమని భావిస్తున్నారు. వీటితో పాటు, లేజర్ బీమ్ రైడింగ్ వంటి అధునాతన సాంకేతిక పరిజ్ఞానం కలిగిన కొత్త తరం ఇగ్లా క్షిపణులపై కూడా భారత్ దృష్టి సారించినట్లు తెలుస్తోంది. అంతేకాకుండా, దేశీయంగా అభివృద్ధి చేసిన ఇంటిగ్రేటెడ్ డ్రోన్ డిటెక్షన్ అండ్ ఇంటర్‌డిక్షన్ సిస్టమ్ (IDDIS) వంటి వ్యవస్థలను కూడా మోహరించడం ద్వారా సరిహద్దుల్లో గగనతల రక్షణను మరింత పటిష్టం చేయాలని భారత్ లక్ష్యంగా పెట్టుకుంది.
