సూపర్ స్టార్ మహేష్ బాబు (Mahesh Babu), దర్శకధీరుడు రాజమౌళి (Rajamouli) కలిసి ఒక భారీ ప్రాజెక్ట్ చేస్తున్న సంగతి తెలిసిందే. శ్రీ దుర్గ ఆర్ట్స్ బ్యానర్ పై కె.ఎల్.నారాయణ అత్యధిక బడ్జెట్ తో నిర్మిస్తున్న ఈ సినిమాపై అంచనాలు ఆకాశాన్నంటే స్థాయిలో ఉన్నాయి. ప్రస్తుతం షూటింగ్ దశలో ఉన్న ఈ చిత్రంలో ప్రియాంక చోప్రా, పృథ్వీరాజ్ సుకుమారన్ వంటి స్టార్స్ నటిస్తున్నారు. అసలు ఈ సినిమా కథ ఎలా ఉండబోతుందో తెలుసుకోవాలనే ఆసక్తి అందరిలో నెలకొంది. కనీసం అఫీషియల్ అనౌన్స్ మెంట్ వీడియో వచ్చినా చాలని అభిమానులు వేయి కళ్ళతో ఎదురుచుస్తున్నారు. ఇలాంటి సమయంలో ఈ మూవీ రిలీజ్ డేట్ లాక్ అయిందనే వార్త ఆసక్తికరంగా మారింది.
‘బాహుబలి’, ‘ఆర్ఆర్ఆర్’ సినిమాలతో ప్రపంచస్థాయి గుర్తింపు పొందారు రాజమౌళి. ఇప్పుడు మహేష్ తో చేసేది.. గ్లోబల్ మార్కెట్ ని దృష్టిలో పెట్టుకొని చేస్తున్న ఫిల్మ్ అని ప్రత్యేకంగా చెప్పనక్కర్లేదు. భారీ తారాగణం, భారీ బడ్జెట్ తో తెరకెక్కే ప్రాజెక్ట్ కాబట్టి.. షూటింగ్ మొదలైన తర్వాత కూడా సినిమా విడుదల కావడానికి కనీసం రెండు మూడేళ్లు పట్టే అవకాశముంటుంది. దాంతో సినిమా ఎప్పుడు విడుదలవుతుందంటే.. ఇప్పుడే చెప్పలేని పరిస్థితి. అలాంటిది మహేష్ మూవీ రిలీజ్ డేట్ ని.. రాజమౌళి ముందే లాక్ చేశారట.
ఈ చిత్రం ‘SSMB29’ అనే వర్కింగ్ టైటిల్ తో యాక్షన్ అడ్వెంచర్ గా దాదాపు రూ.1000 కోట్ల బడ్జెట్ తెరకెక్కుతోందని తెలుస్తోంది. ఈ చిత్రాన్ని 2027 మార్చి 25న విడుదల చేయాలని రాజమౌళి భావిస్తున్నారట. ఈ డేట్ కి ఒక ప్రత్యేకత ఉంది. రాజమౌళి గత చిత్రం ‘ఆర్ఆర్ఆర్’ 2022 మార్చి 25న విడుదలైంది. 2027 మార్చి 25కి ‘ఆర్ఆర్ఆర్’ విడుదలై సరిగ్గా ఐదేళ్లు పూర్తవుతుంది. దాంతో ఆ డేట్ కి ‘SSMB29’ రానుందనే వార్త హాట్ టాపిక్ గా మారింది. ‘ఆర్ఆర్ఆర్’ తో ఆస్కార్ వేదికపై తెలుగు సినిమా పేరు మారుమోగేలా చేసిన రాజమౌళి.. ‘SSMB29’తో ఇంకెన్ని సంచలనాలు సృష్టిస్తారో చూడాలి.
