తెలంగాణ రెవెన్యూ, గృహనిర్మాణ శాఖ మంత్రి పొంగులేటి శ్రీనివాస్ రెడ్డి సీఎం రేవంత్ రెడ్డిని కలిశారు. తన పుట్టినరోజు పురస్కరించుకొని జూబ్లీహిల్స్లోని సీఎం నివాసంలో మర్యాదపూర్వకంగా కలిశారు. ఈ సందర్భంగా పొంగులేటికి సీఎం రేవంత్ పుట్టినరోజు శుభాకాంక్షలు తెలిపారు. ప్రతినిత్యం ప్రజా సేవలో నిమగ్నమై.. తెలంగాణ అభివృద్ధికి పాటుపడాలని అందుకు భగవంతుడు సంపూర్ణ ఆయురారోగ్యాలు ప్రసాదించాలని సీఎం రేవంత్ ఆకాంక్షించారు. తనకు శుభాకాంక్షలు తెలిపిన సీఎం రేవంత్కు మంత్రి పొంగులేటి ధన్యవాదాలు తెలిపారు.
ఇక పొంగులేటి పుట్టినరోజు వేడుకలను ఆయన అనుచరులు, అభిమానులు ఘనంగా నిర్వహించారు. కేకులు కట్ చేసి మంత్రికి విషెస్ చెబుతున్నారు. ఇక తన తన పుట్టిన రోజున మంత్రి పొంగులేటి కీలక నిర్ణయం తీసుకున్నారు. అభిమానులకు, కార్యకర్తలకు స్పెషల్ రిక్వెస్ట్ చేశారు. తను విషెస్ చెప్పేందుకు వచ్చే మిత్రులు, శ్రేయోభిలాషులు, అభిమానులు, నాయకులు, కార్యకర్తలు బొకేలు, శాలువాలు లేకుండానే రావాలని సూచించారు. బొకెలు, శాలువాలు వద్దు.. కరచాలనం ముద్దు అని పేర్కొన్నారు.
బొకేలు, శాలువాలు, కేక్లు, మెమోంటోలకు అయ్యే ఖర్చులను సమాజ, సామాజిక కార్యక్రమాలకు వినియోగించాలని కోరారు. పేద విద్యార్థులకు నోటు పుస్తకాలు, పేద ప్రజలకు వస్త్రాలు పంపిణీ చేయాలన్నారు. మెడికల్ క్యాంపులు, రక్తదాన, అన్నదాన కార్యక్రమాలు చేయాలని పిలుపునిచ్చారు. అనవసరమైన ఖర్చులను తగ్గించాలని.. తన పుట్టిన రోజు వేడుకలు ఎక్కడ నిర్వహించినా.. ఆయా ప్రాంతాల్లో హంగు ఆర్భాట కార్యక్రమాలు తగ్గించుకోవాలన్నారు.
