హైదరాబాద్ కు చెందిన ఐటీ నిపుణుడు, పక్షి ప్రేమికుడు హరి కె. పాటిబండ తీసిన ఓ ఫొటో అంతర్జాతీయ అవార్డు సాధించింది. పక్షి ప్రపంచంలో అరుదైన దృశ్యాన్ని కెమెరాలో బంధించినందుకు ‘ఉత్తమ వైల్డ్ లైఫ్ ఫొటోగ్రాఫ్’గా ఎంపికైంది. వికారాబాద్ అడవుల్లో ఓ గుడ్లగూబ గాల్లో ఎగురుతుండగా దానిపై నల్ల ఏట్రింత (బ్లాక్ డ్రోంగో) అనే చిన్న పక్షి ఒక్కసారిగా వాలి వేధిస్తున్నప్పుడు హరి రెప్పపాటులో ఫొటో తీశారు.
ఈ ఫొటోను ప్రముఖ అంతర్జాతీయ ఫొటో అవార్డుల సంస్థ ‘35అవార్డ్స్’కు పంపారు. ప్రపంచవ్యాప్తంగా వివిధ ఫొటోగ్రాఫర్లు పంపిన 1.15 లక్షల ఫొటోల్లో ఇది కూడా ఒకటి. చివరకు ఈ జాబితాలోంచి టాప్ 100 ఫొటోల్లో హరి తీసిన ఫొటో కూడా చోటు దక్కించుకుంది. చివరకు మూడు రౌండ్ల ఓటింగ్ తర్వాత 50 మంది న్యాయ నిర్ణేతల బృందం ఈ ఫొటోను పోటీలో విజేతగా ఎంపిక చేసింది. ఈ ఫొటోను తమ వెబ్ సైట్ లో ప్రదర్శించింది.
