మోడీ లేని భారతదేశాన్ని ఊహించలేమని కేంద్ర మంత్రి, బీజేపీ రాష్ట్ర అధ్యక్షుడు కిషన్ రెడ్డి అన్నారు. ఆదివారం యూసుఫ్ గూడ కృష్ణానగర్‌లో జైన్ మందిర్‌ను సందర్శించారు. అనంతరం మహావీర్ జయంతి వేడుకల్లో పాల్గొన్నారు. జూబ్లీహిల్స్ నియోజకవర్గంలోని యూసుఫ్ గూడ, శ్రీనగర్ నగర్ డివిజన్, హైలైన్ కాలనీ నుంచి కిషన్ రెడ్డి ప్రచార యాత్ర ప్రారంభమైంది. అనంతరం ఆయన మాట్లాడుతూ.. కేసీఆర్ పోయిండు.. ఆయన పని అయిపోయింది.. కేసీఆర్ ఇక రాడని విమర్శించారు. ఆయన కుటుంబం తెలంగాణ రాష్ట్రాన్ని దోచుకుందని మండిపడ్డారు. కాంగ్రెస్ పార్టీ నమ్మక ద్రోహం చేసిందని, వెన్నుపోటు పొడిచిందని విమర్శించారు. హామీల పేరు చెప్పుకుని.. అధికారంలోకి రాగానే మోసం చేసిందన్నారు. మోడీ లేని భారతదేశాన్ని ఊహించలేమన్నారు. దేశానికి ఎవరు ప్రధాని కావాలో.. ఏ పార్టీ అధికారంలో ఉండాలో నిర్ణయించే ఎన్నికలు ఇవి అని చెప్పారు. మోడీ నాయకత్వంలోనే మనం కొనసాగాలని, దేశంలోని అనేక సమస్యలను మోడీ పరిష్కరించాడన్నారు. అదే విధంగా జాతీయ నేతల సభలు ఉంటాయని, ప్రచారంలో పెద్ద నేతలు పాల్గొంటారని తెలిపారు. మోడీ కూడా తెలంగాణలో ప్రచారంలో పాల్గొంటారని అన్నారు. సభల కంటే ఓటర్లను రీచ్ అయ్యేలా కార్యక్రమాలు చేస్తామన్నారు. కేసీఆర్ బస్సు యాత్ర ఎందుకు చేస్తున్నారో కూడా తెలియదన్నారు. కేసీఆర్ పని అయిపోయిందని, కేసీఆర్ ఎన్ని యాత్రలు చేసినా కూడా ప్రజలు నమ్మరు.. ఓట్లు పడవని కిషన్ రెడ్డి కీలక వ్యాఖ్యలు చేశారు.
*25న రాష్ట్రానికి అమిత్ షా*
కేంద్ర హోంమంత్రి అమిత్ షా ఈ నెల 25న రాష్ట్రంలో పర్యటిస్తారని కిషన్ రెడ్డి మీడియాకు తెలిపారు. రాష్ట్ర పర్యటనకు వస్తున్న బీజేపీ జాతీయ ప్రధాన కార్యదర్శి, రాష్ట్ర పార్టీ ఇంచార్జ్ సునీల్ బన్సాల్ ఆది, సోమవారాల్లో వివిధ సభల్లో పాల్గొంటారని తెలిపారు. ఎన్నికలకు పార్టీ సిద్ధమవుతున్న తీరు, క్షేత్రస్థాయిలో జరుగుతున్న ప్రచారంపై ఆయన సమీక్ష నిర్వహించనున్నట్టు తెలిసింది. ఈ నెలాఖరులో లేదా మే మొదటి వారంలో ప్రధాని మోడీ రాష్ట్రంలో పర్యటించనున్నట్లు సమాచారం. బహుళ దశల ప్రచారంలో మోడీ 3-4 సభలు, రోడ్‌షోల్లో పాల్గొంటారని తెలుస్తోంది. అయితే బీజేపీ జాతీయ అధ్యక్షుడు జేపీ నడ్డా కూడా ఈ నెలాఖరు లేదా మే 10న రాష్ట్రానికి వస్తారని పార్టీ నేతలు చెబుతున్నారు. జాతీయంగా ప్రచారానికి మోడీ, అమిత్ షా, నడ్డా, కేంద్రమంత్రులు, బీజేపీ పాలిత సీఎంలు వస్తారని తెలుస్తోంది.
