నేడు విశాఖలో కాంగ్రెస్‌ పార్టీ న్యాయసాధన సభ
భారీగా ఫ్లెక్సీల ఏర్పాటు
విశాఖ స్టీల్‌ ప్లాంట్‌ ప్రైవేటీకరణకు వ్యతిరేకంగా సభ
(అమ్మన్యూస్‌ ప్రతినిధి, హైదరాబాద్‌): తెలంగాణ ముఖ్యమంత్రి రేవంత్ రెడ్డి శనివారం ఏపీకి వెళ్తున్నారు. విశాఖకు ఆయన వెళ్లనున్నారు. విశాఖ స్టీల్‌ ప్లాంట్‌ ను కేంద్ర ప్రభుత్వం ప్రైవేటీకరించడాన్ని వ్యతిరేకిస్తూ గత రెండేళ్లుగా ఉద్యమం జరుగుతోంది. స్టీల్‌ ప్లాంట్‌ పరిరక్షణ కోసం కాంగ్రెస్‌ పార్టీ కూడా పోరాడుతోంది. ఈ క్రమంలో ఈ ఉద్యమాన్ని ప్రజల్లోకి మరింతగా తీసుకెళ్లేందుకు రేవంత్ విశాఖకు వెళ్తున్నారు.
సాయంత్రం విశాఖలో బహిరంగ సభను నిర్వహించనున్నారు. ఈ సభకు రేవంత్ ముఖ్య అతిథిగా హాజరై ప్రసంగించనున్నారు. ఈ సభకు ’న్యాయసాధన సభ’ అని పేరు పెట్టారు. ఈ సభకు ఏపీసీసీ చీఫ్‌ వైఎస్‌ షర్మిల, రాష్ట్ర కాంగ్రెస్‌ వ్యవహారాల ఇన్ఛార్జీ మాణికం ఠాగూర్, రఘువీరారెడ్డి, గిడుగు రుద్రరాజు, పల్లంరాజు, జేడీ శీలం, కేవీపీ రామచంద్రరావు తదితర కీలక నేతలు హాజరుకానున్నారు. ఈ సభకు దాదాపు 70 వేల మంది హాజరవుతారని అంచనా వేస్తున్నారు. ఒక్కో నియోజకవర్గం నుంచి కనీసం రెండు వేల మందిని తీసుకురావలని నిర్ణయించారు. రేవంత్ రానున్న నేపథ్యంలో, ఆయన ఫొటోలతో ఉన్న ఫ్లెక్సీలను భారీ ఎత్తున ఏర్పాటు చేశారు.
